Aýyzsýdy avtokólik jýý oryndarynda jumsaýǵa jol bermeýge kerek - Prezıdent
ASTANA. KAZINFORM – Úkimet Ulttyq sý resýrstarynyń aqparattyq júıesin qurý jumysyn qysqa merzimde aıaqtaýy kerek. Bul týraly Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn jarııalap jatqan Prezıdent Qasym-Jomart Toqaev aıtty.
- Elimizdegi sý tapshylyǵy máselesi júıeli ári batyl sharalar qabyldaýdy talap etetinin erekshe atap ótkim keledi. Eń aldymen, qazirgi jaǵdaıda qundylyǵyn asyra baǵalaý qıyn sý resýrstaryn utymdy ári únemdi paıdalaný qaǵıdattaryn barlyq jerde engizý qajet. Úkimet pen ákimdikter sý tutynýdy baqylaýdy kúsheıtip, jelilerdegi shyǵyndy azaıtýǵa jáne aýyzsýdy maqsatsyz paıdalanýǵa, onyń ishinde avtokólik jýý oryndarynda jumsaýǵa jol bermeýge tıis. Sý óziniń naqty qunymen baǵalanýy kerek. Meniń tapsyrmam boıynsha Úkimet sý tutyný salasynda aýqymdy tarıftik reformany bastady. Ony qısyndy aıaqtalýyna deıin jetkizý qajet, - dedi Memleket basshysy.
Prezıdent sýǵa uqypty qaraý sharýashylyq júrgizýdiń mindetti qaǵıdatyna aınalýy kerektigin basa aıtty.
- Sý resýrstaryn tolyq ári naqty esepke alý úshin tsıfrlyq quraldardy keńinen paıdalaný asa mańyzdy. Bul jańa óndiris oryndaryn josparlaý kezinde negizdelgen sheshimder qabyldaýǵa múmkindik beredi. Sondyqtan Úkimet Ulttyq sý resýrstarynyń aqparattyq júıesin qurý jumysyn barynsha qysqa merzimde aıaqtaýy kerek, - dedi Qasym-Jomart Toqaev.
Buǵan deıin Memleket basshysy el ómirindegi tarıhı ózgeristerdiń barlyǵy halyqtyń kóz aldynda bolyp jatqanyn aıtqan edi.
