Aýyzymen oraq orǵandar emes, istiń adamy baǵalanýy qajet — Prezıdent
ASTANA. KAZINFORM — Elimizde azamattyq sana-sezim men ult mentalıtetinde baıypty ári aýqymdy jańǵyrý júrip jatyr. Soǵys pen daǵdarystan kóz ashpaǵan qazirgi álemde birde-bir aımaqta mundaı úlgi eter mysal joq. Bul pikirdi Memleket basshysy Qasym-Jomart Toqaev aıtty.
Prezıdent búginde elimizdegi qoǵamdyq ómirdiń barlyq salasy reformalanyp, biregeı ınnovatsııalyq standarttar men tásilder qoldanylyp jatqanyn atap ótti.
Memlekettik ınstıtýttar men ekonomıkada ǵana emes, eń mańyzdysy, azamattyq sana-sezim men ult mentalıtetinde baıypty ári aýqymdy jańǵyrý úrdisi júrip jatyr.
— Soǵystan, daǵdarystan jáne qyrǵı-qabaq qatynastan kóz ashpaǵan qazirgi álemde mundaı júıeli qoǵamdyq transformatsııanyń ózin biregeı tájirıbe dep ataýǵa bolady. Birde-bir aımaqta mundaı úlgi eter mysal joq. Qazaqstan túbegeıli reforma jolyna tústi, kózge aıqyn kórinetin ózgerister júrip jatqan elge aınaldy dep tolyq senimmen aıta alamyz, — dedi Qasym-Jomart Toqaev Bul týraly birinshi shaqyrylymdaǵy Quryltaıdyń birinshi sessııasynda.
Memleket basshysy osy jańǵyrý jolynan jańylmaı, qol jetkizgen nátıjelerdi ornyqtyrý úshin ultymyzdyń tarıhı damýyndaǵy negizgi aspektilerge qatysty ustanymymyz ben kózqarasymyzdy ózgertý qajettigin basa aıtty.
— Qoǵamymyz ańyzdarǵa emes, shynaıylyqqa arqa súıeýi kerek. Eskilikti ańsamaı, alǵa qaraı umtylyp, ǵylymdy damytýǵa den qoıýǵa tıis. Aýyzymen oraq orǵandar emes, istiń adamy baǵalanýy qajet. Jalǵandyqqa jany qas, shyndyqqa jaq halyq bolǵanymyz jón. Bul asa mańyzdy qaǵıdattar keleshek urpaq ıdeologııasynyń ózegine aınalýǵa tıis, — dedi Prezıdent.
Yntymaǵy men birligi jarasqan halqymyz tarıhta talaı synaqqa qasqaıyp qarsy turdy.
— Endi óziniń kúsh-qýatyn damý kókjıegin keńeıtýge jumyldyrsa degen tilek bar. Jasampazdyq pen eńbek qana muratymyzǵa jetkizedi, — dedi Qasym-Jomart Toqaev.
Eske sala ketsek, Astanada Prezıdenttiń qatysýymen birinshi shaqyrylymdaǵy Quryltaıdyń birinshi sessııasy ashyldy.
Buǵan deıin Q. Toqaev Quryltaıdyń alǵashqy quramyna aıryqsha jaýapkershilik júkteletinin aıtqan edi.
Sheteldik ınvestorlar quıǵan qomaqty qarjy nátıjesinde elimizdiń barlyq óńirinde jańa óndiris nysandary men jumys oryndary ashylyp jatyr.
