Aýyzbastyryq úshin páter talap etken jetisýlyq azamat sottaldy

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq soty alqabılerdiń qatysýymen asa iri mólsherde (múlikti) qorqytyp alý faktisi boıynsha qylmystyq isti qarady. (QK 194-baby 4-bóligi 2-tarmaǵy). Aıyptalýshyǵa 8 jyl bas bostandyǵynan aıyrý jazasy taǵaıyndaldy.

2024 jyldyń mamyr aıynyń sońynda I. buryn jumys istegen JShS basshysyna seriktestik tarapynan jasalǵan buzýshylyqtar týraly aqparat bar ekenin aıtyp, ony jarııa etpeý úshin quny 16 mln teńgeden asatyn páterdi óz menshigine berýdi talap etken. Osyǵan baılanysty jábirlenýshi polıtsııaǵa júgingen.

Tergeý jáne jedel-izdestirý sharalary barysynda polıtsııa qyzmetkerleri aıyptalýshy azamatty jeke notarıýs keńsesinde ustaǵan.

«Alqabılerdiń kesimimen I. taǵylǵan aıyp boıynsha kináli dep tanyldy, sot jazany jeńildetetin mán-jaı retinde sottalýshynyń jas balalarynyń bolýyn jáne aýyrlatatyn mán-jaılardyń bolmaýyn eskerip oǵan 8 jyl bas bostandyǵynan aıyrý jazasyn taǵaıyndady. Úkim zańdy kúshine engen joq» — delingen Jetisý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti taratqan málimette.

Aıta keteıik, QR Qylmystyq kodeksine sáıkes, aıyptalýshyǵa jasaǵan qylmysy úshin 7 jyldan 15 jylǵa deıingi merzimge bas bostandyǵynan aıyrý jáne múlkin tárkileý túrindegi jaza qarastyrylǵan.

Eske salaıyq, buǵan deıin Jarkentte qaıtys bolǵan kapıtan Darhan Nurlanulynyń ólimine qatysty 4 adamnyń qamaýǵa alynǵanyn jazǵanbyz.