Aýyz toltyryp aıtatyndaı nátıje joq – Bektenov Ekologııa mınıstriniń jumysyn synady

ASTANA. KAZINFORM – Úkimet otyrysynda Premer-mınıstr Oljas Bektenov Ekologııa jáne tabıǵı resýrstar mınıstrliginiń qoqys polıgondaryn salý baǵdarlamasyn baıaý iske asyryp jatqanyn aıtyp, synady.

Úkimet basshysynyń naqty suraǵyna jaýap bergen mınıstr Erlan Nysanbaev bul baǵyttaǵy jumystardyń kesheýildep jatqanyna zań normalary da kedergi keltirip jatqanyn aıtty.

— Úkimet 2023 jyldyń aıaǵynda keshendi is-sharalar josparyn bekitken bolatyn. Onda 100 jańa polıgon salý qarastyrylǵan. Búgingi tańda jospardaǵy 120 polıgonnyń jeteýi salynyp, iske qosyldy. 23 polıgonnyń jobalaý-smetalyq qujattamasy ázirlendi. 18 polıgonnyń qujattamasy ázirlenip jatyr. Qalǵan 52 polıgon boıynsha bıyl óńirlerge qujattama ázirleýge qarajat qarastyrylǵan. Polıgondardyń Ekologııalyq kodekske sáıkes kelmeýiniń birden-bir sebebi — qala men aýyldarǵa birdeı talap qoıylýynda. Aýyldy mekenderge tıisti talaptardy oryndaý úshin qyrýar qarajat kerek. Kodekste osy talaptardy jeńildetý boıynsha ózgerister qarastyrylǵan. Biz óz tapsyrmańyz boıynsha polıgondardyń qurylysyna ýtıl alym esebinen qarjylandyrý kózdelip otyr, — dedi mınıstr.

Alaıda Oljas Bektenov mınıstrlik ákimdikterdiń jumysyn tıimdi úılestire almaı otyrǵanyn aıtty.

— Jalpy osy baǵytta jumys baıaý júrip jatyr. Aýyz toltyryp aıtatyndaı nátıje joq. Mınıstrlik ákimdikterdiń jumysyn durystap úılestirý kerek. Osy baǵytta mınıstrliktiń belsendi ustanymy kerek. Ony biz kórip otyrǵan joqpyz, — dedi Oljas Bektenov.

Aıta ketelik elimizde karbondy polıgondar qurylatyny týraly jazǵan edik.