Aýyz sýmen qamtý: El boıynsha 269 jobanyń tek jartysy ǵana oryndalǵan
ASTANA. KAZINFORM — Óńir ákimdikteri halyqty aýyz sýmen qamtamasyz etý jumystary jóninde esep berdi, dep habarlaıdy Úkimettiń baspasóz qyzmeti.
Premer-mınıstrdiń orynbasary Qanat Bozymbaev Memleket basshysynyń halyqty 100% aýyz sýmen qamtamasyz etý jónindegi tapsyrmasyn iske asyrý, sondaı-aq toptyq sý qubyrlaryn salý men rekonstrýktsııalaý barysy boıynsha keńes ótkizdi.
Jıynǵa Ónerkásip jáne qurylys mınıstrliginiń, Sý resýrstary jáne ırrıgatsııa mınıstrliginiń, sondaı-aq oblys ákimdikteriniń basshylary qatysty.
Bıyl toptyq sý qubyrlaryn salý jáne rekonstrýktsııalaý jobalaryn júzege asyrýǵa 70,2 mlrd teńge qarastyrylǵan, onyń ishinde 47,5 mlrd teńge Arnaýly memlekettik qordan bólindi. Sý resýrstary jáne ırrıgatsııa mınıstrligi tapsyrys berýshi retinde 20 jobany júzege asyryp jatyr, jyl sońyna deıin sonyń 8-in aıaqtaý josparlanǵan. Nátıjesinde 149 aýyldyq eldi mekende sýmen jabdyqtaý jaqsaryp, 4 aýyl (1,5 myń turǵyn) ortalyqtandyrylǵan aýyz sýǵa qosylady.
Soltústik Qazaqstan, Almaty jáne Aqmola oblystarynda alty joba boıynsha jobalyq-smetalyq qujattamany ázirleý jumystary júrgizilýde. Bıylǵy jyly halyq sany 40 myńnan asatyn 49 aýyl ortalyqtandyrylǵan aýyz sý júıesine qosylady. Sý resýrstary jáne ırrıgatsııa mınıstrligi barlyq josparlanǵan jobalardy belgilengen merzimde aıaqtaýdy kózdep otyr.
Qanat Bozymbaev toptyq sý qubyrlary birqatar óńirlerde aýyz sýdyń negizgi kózi bolyp tabylatynyn atap ótip, olardyń qurylysy men jańǵyrtý jumystaryn jedeldetý qajettigin jetkizdi.
Keńeste óńirlerdiń esepteri tyńdaldy. Eske sala keteıik, Memleket basshysynyń halyqty aýyz sýmen qamtamasyz etý jónindegi tapsyrmasyn oryndaý úshin óńirlerge eki transhpen 161 mlrd teńge bólingen. Qazirgi ýaqytta el boıynsha 269 joba júzege asyrylyp jatyr, alaıda olardyń bir bóligi nebári 50%-ǵa ǵana oryndalǵan.
Abaı, Aqmola, Qaraǵandy, Pavlodar, Soltústik Qazaqstan, Túrkistan oblystary men Almaty qalasynda jumystardyń keshiktirilip, ýaqytyly aıaqtalmaý qaýpi bar óńirler retinde ataldy. Almatyda qarjynyń ıgerilmeýi jáne jobalardy baıaý júzege asyrý baıqalýda, al Abaı oblysynda onyń ishinde úsheýi Semeıde bolatyn jeti joba boıynsha jumystar bastalmaǵan.
— Qys bastalǵanǵa deıin eki aı ýaqyt qaldy. Keler jylǵa ótetin joba bolmaýy tıis. Bıyl aıaqtalýy josparlanǵan barlyq nysandar ýaqytynda tapsyrylýy kerek. Sýmen qamtamasyz etý máselesi — meniń jeke baqylaýymda, — dep atap ótti vıtse-premer.
Keńes qorytyndysy boıynsha Qanat Bozymbaev Óndiris jáne qurylys mınıstrligine, Sý resýrstary jáne ırrıgatsııa mınıstrligine jergilikti jerlerde jumystyń barysyna turaqty monıtorıng uıymdastyrýdy, al ákimdikterge jergilikti bıýdjet esebinen qajetti qarajat bólýdi jáne bıyl paıdalanýǵa berilýi tıis barlyq nysandardy ýaqytyly aıaqtaýdy tapsyrdy.
Budan buryn Oljas Bektenov temir jol jobalaryn ýaqytyly paıdalanýǵa berýdi tapsyrǵanyn jazǵan edik.