Aýyz sýmen qamtamasyz etý jobalaryna óńirdiń birinshi basshylary tikeleı jaýap beredi - Bektenov
ASTANA. KAZINFORM – 2026 jyly toptyq sý qubyrlary biryńǵaı keshender retinde ákimdikterdiń balansyna berilmek. Mundaı tapsyrmany búgin Úkimet otyrysynda Premer-mınıstr Oljas Bektenov berdi.
- Óńir ákimdikteri jyl sońyna deıin aýyz sýmen qamtamasyz etý boıynsha qoldanystaǵy barlyq jobalardy iske qosýdy qamtamasyz etsin. Buǵan óńirlerdiń birinshi basshylary tikeleı jaýap beredi. Qarjy mınıstrligi bekitilgen qarajatty jergilikti atqarýshy organdarǵa jedel tártippen aýdarýy qajet, - dedi Oljas Bektenov.
Sonymen qatar ol Ónerkásip mınıstrligi jelilerdi jańǵyrtý kezinde qoldanystaǵy káriz tazartý qurylystarynyń ónimdiligin ulǵaıtýǵa jáne aǵyndy sýlardy tazartý sapasyn arttyrýǵa basa nazar aýdarýy kerektigin aıtty. Osy oraıda vedomstvoǵa ákimdiktermen birlesip, 1 qyrkúıekke qaraı energetıkalyq jáne kommýnaldyq sektorlardy jańǵyrtýdyń ulttyq jobasyn iske asyrý jónindegi ınvestıtsııalyq baǵdarlamalardy ázirleýdi tapsyrdy.
- Sý resýrstary mınıstrligi osy jyldyń sońyna deıin toptyq sý qubyrlaryn salý jáne jańǵyrtý jobalaryn aıaqtaýdy qamtamasyz etsin. Qarjy mınıstrligimen birlesip, 2026 jyly toptyq sý qubyrlaryn biryńǵaı keshender retinde ákimdikterdiń balansyna berýdi qamtamasyz etsin. Ulttyq ekonomıka mınıstrligi múddeli memlekettik organdarmen birlesip, múlikti respýblıkalyq menshikten kommýnaldyq menshikke berý máselelerin retteıtin normatıvtik quqyqtyq aktilerge ózgerister men tolyqtyrýlar engizsin, - dedi Úkimet basshysy.
Premer-mınıstr Sý resýrstary mınıstrligi Ónerkásip mınıstrligimen birlesip, sý obektileriniń tsıfrlyq pasporttary men ıntellektýaldyq sý kadastryn engizý máselesin pysyqtaýǵa tıistigin basa aıtty.
- Ulttyq ekonomıka mınıstrligi Qarjy mınıstrligimen jáne «Báıterek» holdıngimen birlesip, Ulttyq joba aıasynda kózdelgen ınvestıtsııalyq jobalardy qarjylandyrýdy qamtamasyz etsin, - dedi ol.
Buǵan deıin Oljas Bektenov iske asyrylý merzimi sozylyp ketken taza aýyz sý jobalaryn ataǵan edi.