Aýyz sýdy óndiristik maqsattarǵa paıdalanýǵa tyıym salyndy
ASTANA. KAZINFORM – Sý kodeksi óndiristik maqsatqa tek tehnıkalyq sý paıdalanýǵa mindetteıdi. Bul týraly Sý resýrstary jáne ırrıgatsııa mınıstriniń birinshi orynbasary Bolat Beknııaz ortalyq kommýnıkatsııalar qyzmetinde ótken baspasóz máslıhatynda aıtty.
- Jalpy alǵanda, Sý kodeksiniń jobasy sý sharýashylyǵy qurylystaryn tolyqqandy esepke alý, olardyń sandyq jáne sapalyq kórsetkishterin baǵalaý, balamaly sý kózderin paıdalaný, erigen sýlardy jınaý jáne olardy 2 mln tekshe metrden aspaıtyn kólemde egin sýarýǵa arnaıy ruqsatsyz da paıdalaný, sý obektilerin monıtorıngileý normalaryn naqtylaıdy.
Sondaı-aq qujat sýmen jabdyqtaý jáne sý burý júıelerin damytý, nóser jáne drenaj sýlaryn retteý, ıesiz júıelerdi kommýnaldyq menshikke berý, óndiristik maqsattarda aýyz sýdyń ornyna tehnıkalyq sýdy paıdalaný, qyzmetterdi ýaqytsha toqtatý jáne ınfraqurylymdy kezeń-kezeńimen jańartý boıynsha tehnıkalyq aýdıt negizinde sharalar qabyldaýdy kózdeıdi, - dedi vıtse-mınıstr.
Bolat Beknııaz Ulttyq gıdrologııalyq qyzmetti qurý ne úshin qajet bolǵanyn aıtty.
- Sý kodeksiniń aıasynda jerasty sýlaryn izdeý, baǵalaý, monıtorıng jáne qorǵaý salasyndaǵy normalar da kúsheıtildi. Bul máselelermen Sý resýrstary jáne ırrıgatsııa mınıstrligi quramyndaǵy Ulttyq gıdrologııalyq qyzmet aınalysady, - dedi ol.
Eske salsaq, 9 sáýirde Prezıdent Qazaqstan Respýblıkasynyń Sý kodeksine qol qoıdy.