Aýyspaly nómirlerden jasalǵan 43 mln-nan astam qońyraý buǵattaldy

Búginde ishki ister organdarynyń aldynda turǵan eń basty mindetterdiń biri – kıberqylmysqa qarsy kúres. Qazaqstanda sońǵy jeti jylda ınternet-alaıaqtyq sany 10 esege, ıaǵnı eki myńnan 20 myń qylmysqa deıin ósken. Bıyldyń ózinde ınternet-alaıaqtar azamattarǵa 17,5 mlrd teńgeden astam shyǵyn keltirdi, – dep habarlaıdy Polisia.kz saıty. 

Eń jıi kezdesetin aldaý túri – ınternet arqyly “joq” taýarlardy satý nemese qyzmet kórsetý kezinde aldyn ala tólem alý (jeti myń fakt).

Ekinshi orynda – bank qyzmetkerleriniń atynan jasalatyn qońyraýlar (eki jarym myń fakt).

Úshinshi orynda – onlaın-qaryzdardy resimdeý (eki myń fakt).

– Kıberqylmystyń ósýi jáne onyń jańa túrleriniń paıda bolýy tek Qazaqstan men TMD elderinde ǵana emes, búkil álemde baıqalady. Mundaı qylmystar transshekaralyq sıpatqa ıe. Sondyqtan da olardy ashý qıynǵa soǵyp jatady.

Ózderińiz biletindeı, ınternette shekara joq. Qylmyskerler túrli anonımdi, shet elderde ornalasqan servısterdi paıdalanady, – dep atap ótti QR ІІM krımınaldyq polıtsııa departamentiniń kıberqylmysqa qarsy kúres ortalyǵynyń bastyǵy Jandos Súıinbaı.

Aqparattyq tehnologııalar salasyndaǵy qylmystardyń aldyn alý jáne olardy ashýmen ІІM krımınaldyq polıtsııa departamentiniń kıberqylmysqa qarsy kúres ortalyǵy aınalysady.

– Bıyl júrgizilgen is-sharalar nátıjesinde úsh myńnan astam ınternet-alaıaqtyq jasaǵan 828 adam qylmystyq jaýapkershilikke tartyldy. Qyrkúıek aıynda Óskemende 50-den astam ınternet-alaıaqtyq faktisine qatysy bar úsh kúdikti ustaldy. Olardan uıaly telefondar, noýtbýkter tárkilendi. Jalpy keltirilgen shyǵyn 80 mln teńgeni qurady, – dedi spıker.

Jeltoqsan aıynda elordada polıtseıler tórt alaıaqtyq sall-ortalyqty anyqtady. Tintý is-sharalary barysynda tártip saqshylary 170-ten astam noýtbýk pen jelilik jabdyqty tárkiledi. Múddeli memlekettik organdarmen jáne baılanys operatorlarymen birlesip, aýyspaly nómirlerden túsetin qońyraýlardy buǵattaý boıynsha jumys jalǵasyp jatyr.

Aǵymdaǵy jyly 43 mıllıonnan astam qońyraý buǵattaldy.

Sonymen qatar 15 qarashadan bastap Qazaqstan turǵyndarynyń statsıonarlyq telefondaryna kelip túsetin halyqaralyq qońyraýlardy anyqtaý jáne buǵattaý júıesi iske qosyldy.

Júıe iske qosylǵan sátten beri 278 myńnan astam qońyraý buǵattaldy. Sondaı-aq, qaryz alý rásimderi sms arqyly rastaý jáne bıometrııa júıesimen kúsheıtildi.