Aýyr jumys, az jalaqy, kóshege qoqys tastaıtyndarǵa eskertý – kóshe tazalaýshymen suhbat
ÓSKEMEN. KAZINFORM – Shárban Muratqyzynyń «Taza Óskemen» kommýnaldyq kásipornynda jumys istep kele jatqanyna bıyl 12 jyl toldy. Qystyń kózi qyraýda qar kúrep, jylaýyq kúzdiń jańbyrynda kóshe sypyrý – áıel adam úshin ońaı emes. Sonda da jumystyń aýyrlyǵyna ábden eti úırenipti.
Kazinform tilshisi ony áńgimege tartyp, 2025 jyl – Jumysshy mamandyqtary jylynda qandaı ózgeris, qoldaý qajettigin surap kórdi.
- Jumysyńyz jaıly aıta ketseńiz, mindetterińiz qandaı ?
- Jasym 51-de. Qysta qar kúreımiz. Aıaldamalardaǵy juqa qardy sypyramyz. Jazda da kóshe tazalaımyz. Toǵaılardy aǵartyp, qoqys jınaımyz. Jumystyń aýyrlyǵy ras endi. Qar, jańbyr jaýyp tursa da óz mindetimizdi atqara beremiz. Sonda da jumysym ózime unaıdy.
- Jumys grafıgi qalaı ?
- Biz áleýmettik qyzmetkermiz. Ákimdikpen jasasqan kelisimshartta 22 jumys kúni dep bekitilgen. Biraq ashyǵyn aıtqanda aıyna 26 kún jumys istep, aptasyna tek 1 kún demalamyz. Saǵat 08.00-den 17.00-ge deıin jumys isteımiz. Ýaqyt beldeýiniń bir saǵat artqa jyljýyna baılanysty grafıkti ózgerttik, sebebi kún erte batady. Qazir jumys ýaqyty 07.00-den 16.00-ge deıingi aralyqta.
- Osy jumysta júrgenińizge qansha ýaqyt boldy ?
- 12 jyl boldy. Aýyrlyǵyna etimiz úırendi. Kún saıyn kem degende 3-4 kósheni tazalaımyz. Ertis, Úlbi kópirlerine, jaǵalaýlarǵa, aıaldamalarǵa, aýlalarǵa baramyz. Negizi ár kóshege óziniń bekitilgen jumysshylary bar. Dese de adam kúshi jetispegendikten osylaı baryp otyramyz. Áriptesterimizben únemi bir-birimizdi kúldirip, ázil-qaljyń aıtyp júremiz. Sonda jumys jeńildep, aınala shýaq shashyp turǵandaı bolady.
- Memleket basshysy 2025 jyldy Jumysshy mamandyqtary jyly dep jarııalady. Sol jylda sizderdiń jumystaryńyzǵa qandaı ózgeris, qoldaý qajet dep oılaısyz ?
- Bul óte durys bastama. Jumysshy mamandyqtaryna qoldaý qajet. Eń áýeli, jalaqymyz ósse eken deımiz. Sebebi qazir aptasyna 6 kún eńbektenip, 200 myń teńge ǵana aılyq alamyz. Qymbatshylyqtyń beleń alyp bara jatqanyny áne. Tapqan-taıanǵanymyz kúnkóriske áreń jetedi. Sondyqtan jalaqymyz 300 myń teńgege ósse degen tilegimiz bar. Basqalar sekildi mereke saıyn syıaqy alsaq. Bizde qazir syıaqy jylyna 1 ret qana. Áıelderge 8 naýryzda, erlerge 7 mamyrda.
Odan keıin jumys grafıgi aptasyna 5 ret bolsa. El qatarly eki kún demalyp, tynyqsaq nur ústine nur bolar edi. Áıtpese «adam jetpeı jatyr» dep senbi kúni shaqyra beredi. Buǵan etimiz úırengeni sonsha aıtpasa da jumysqa shyǵatyn boldyq.
- Otbasyńyz jaıly aıta ketseńiz...
- Joldasym, 3 balam bar. Úlken qyzym Almatyda otaý qurǵan. Eki qyzym Qytaıdyń Beıjiń jáne Shanhaı qalalarynda doktorantýra men magıstratýrada oqyp jatyr. Kúıeýim de «Taza Óskemen» kásipornynda jumys isteıdi. Biraq onyń mindeti basqa.
- Aınalaǵa qoqys shashyp júretin adamdarǵa ne aıtqyńyz keledi ?
- Aıtarym kóp. Únemi solardyń shashyp tastaǵan qoqystaryn jınap júremiz. Ásirese jaǵalaýda ıt serýendetetinderge ókpemiz qara qazandaı. Sebebi únemi oryndyqtardyń qasynda ıtteriniń nájisteri jatady. Ózderimen alyp ketý degen atymen joq. Bul kósheni lastaý ǵoı. Keıbireýler úıdegi turmystyq qaldyqtar salynǵan paketti óz aýlasyndaǵy qoqys jáshigine aparýǵa erinip, aýladaǵy, jaǵalaýdaǵy ýrnaǵa nyǵap ketedi. Bul adam júretin jer bolǵandyqtan kúlimsi ıis shyǵyp, halyqqa qolaısyzdyq týdyrady. Sol úshin olarǵa aıtarym, aınalany taza ustap, tabıǵatty aıalap júreıik!
Eske salsaq, byltyr qyrkúıek aıynda Prezıdent Qasym-Jomart Toqaev Qazaqstan halqyna Joldaýynda 2025 jyldy Jumysshy mamandyqtary jyly dep jarııalaǵan.
Osyǵan deıin jaqyndarynan aıyrylyp, japadan jalǵyz qalǵan qarttar men qamqor bolar eshkimi joq múgedek jandarǵa qaraılasatyn áleýmettik qyzmetkermen suhbat alǵan bolatynbyz.