Aýyr júk kólikterine qoǵamdyq jolda júrýge qashan tyıym salynady
Kólik mınıstrliginiń basshysy Astana qalasynyń turǵyndarymen kezdesip, azamattardy jeke qabyldady. Mınıstrge elordadaǵy qoǵamdyq kólik jelisin damytý, avtobýstarda jol aqysyn tóleý júıeleri, júk tasymaly jáne kólik ınspektsııalarynyń qyzmetine qatysty suraqtar qoıyldy. Sondaı-aq kólik kompanııalarynyń ókilderi kólik quraldarynyń ruqsat etilgen salmaǵynyń artýyn baqylaýdy qamtamasyz etý salasyndaǵy memlekettik saıasatpen kelispeıtindikterin aıtyp jetkizdi, dep habarlaıdy Kazinform.
Marat Qarabaev mınıstrlik óz tarapynan kóliktik baqylaý ınspektorlarynyń jumysyndaǵy sybaılas jemqorlyq táýekelderin joıýǵa jáne ústeme baqylaý tıimdiligin arttyrýǵa baǵyttalǵan birqatar qosymsha sharany engizip jatqanyn habarlady.
«Eger júk kóliginiń ıeleri zańnama talaptaryn saqtasa, durys bolar edi. Alaıda, talaptar jıi buzylyp turady. Bul bıýdjetke orasan zor zııan keltiredi. Máselen, Batys Qazaqstan oblysynda joldyń qurylysyna kiristirilgen aýyr júk kólikteri jańa joldardy qalaı buzǵanyn kórip otyrmyz», – dedi kólik salasyna jaýapty mınıstr.
Qordalanǵan máseleni sheshý úshin mınıstrlik 2024 jyly qalalardyń kiris jáne shyǵys bólikterine beınekameralar ornatýdy bastaıdy. Olar avtomatty túrde artyq salmaq úshin aıyppul salady.
Sonymen birge 220 kamerany «Sergek» beınebaqylaý júıesimen biriktirý josparlanyp otyr.
Sondaı-aq QR Kólik mınıstrligi bólinbeıtin iri kólemdi júkterdi tasymaldaýǵa resmı arnaıy ruqsattar berý jáne samosvaldardyń joldarmen qozǵalysyn shekteý tetikteri pysyqtalýda.
«Álemniń kez kelgen jerinde karerlik aýyr júk kólikteriniń jalpyǵa ortaq paıdalanylatyn avtojoldarmen júrýine tyıym salynady. Qazaqstan, bálkim, mundaıǵa jol bergen jalǵyz el. Biz atalǵan shekteýlerdi 2023 jyldan bastap iske qosqymyz keldi. Deı turǵanmen, naryq qatysýshylary az da bolsa ýaqyt berýdi suraǵan bolatyn. Sondyqtan aýyr karerlik júk kólikterine 2025 jyldyń aıaǵy men 2026 jyldyń basynda qazaqstandyq joldarmen júrýine tyıym salynady», – dep atap ótti Marat Qarabaev.
Sonymen qatar eger mınıstrliktiń usynysy Úkimet pen Parlamentte qoldaý tapsa, tasymaldaýshylar tóleýge tıisti arnaıy ruqsaty bolǵan kezde belgili bir shegine deıin artyq júkterdi tasymaldaýǵa múmkindik beretin norma engiziledi. Atalǵan sheshim jergilikti jerler oryn alýy múmkin sybaılas jemqorlyq táýekelderin joıýdy kózdeıdi.
Dástúr boıynsha turǵyndarmen kezdesýden keıin Kólik mınıstrliginiń basshysy elorda azamattaryn jeke máseleleri boıynsha qabyldady.
Kún tártibinde Soltústik Qazaqstan oblysyndaǵy «Kókterek-Tospa-Jasqaırat-Qaırat» avtojolyn ortasha jóndeý boıynsha memlekettik satyp alý týraly sharttyń júzege asyrylýy, Almaty-Ekaterınbýrg trassasyn jaryqtandyrý, avtobýs aıaldamalaryn ornatý, zańsyz tasymaldaýshylardyń qyzmeti jáne kemelerdiń tehnıkalyq qaýipsizdigin qamtamasyz etý máseleleri qaraldy.
Barlyq kelip túsken ótinishke Marat Qarabaev tolyqqandy jaýap berdi.
Keıbir máseleler mınıstrdiń jeke baqylaýyna alynyp, Komıtetter men qurylymdyq bólimshelerdiń basshylaryna tıisti tapsyrmalar berildi.
