Aýyr júk kólikterin qalaǵa kirgizbeıtin ólsheý júıesi ázirlenip jatyr — Kólik mınıstri
ASTANA. KAZINFORM — Salmaǵy 8 tonnadan asatyn júk kólikteri qalalar men eldi mekenderge kirmeýi kerek. Bul týraly Kólik mınıstri Nurlan Saýranbaev Úkimette ótken brıfıngte aıtty.
Osy sebepti mınıstrlik 220 avtomattandyrylǵan ólsheý júıesin satyp aldy jáne Astana aınalasynda avtomattandyrylǵan ólsheý júıeleriniń jelisin quryp jatyr.
— Qazir «Sergek» kameralary eshteńeni kózden tasa qaldyrmaıdy. Olar aýyr júk kóliginiń nómirin anyqtap, avtomatty túrde onyń ólsheý júıesinen ótken-ótpegenin tekseredi. Eger ótse, birden aıyppul salynyp, aıyp turaǵyna jiberiledi, — dedi Nurlan Saýranbaev.
Onyń aıtýynsha, mundaı kólikter úılerdiń konstrýktsııasyna áser etip qana qoımaı, qala ishindegi joldardy da búldiredi. Qalanyń avtomobıl joldary aýyr júk kólikteriniń júrýine beıimdelmegen.
— Bul álemde bar tájirıbe. Mundaı aýyr kólikter jalpyǵa ortaq joldarǵa shyqpaýy kerek. Máselen, salmaǵy 60 tonnaǵa jetetin iri karerlik júk kólikteri bar. Bul tutas bir vagonnyń salmaǵy. Memleket jol salýǵa trıllıondaǵan qarjy jumsap jatqanda, mundaı kólikter bir maýsymnyń ishinde-aq bárin búldirýi múmkin. Sondyqtan joldardy baqylaý jáne aýyr júk kólikteriniń jolǵa shyǵýy óte qatań túrde toqtatylady, — dedi Kólik mınıstri.
Aı sońynda Astanada avtomattandyrylǵan ólsheý júıeleriniń pılottyq jobasy aıaqtalady. Keıin ony qalalardaǵy beınebaqylaý júıelerimen baılanystyrý qıyn bolmaıdy, óıtkeni mundaı júıeler barlyq qalada bar.
— Pılottyq joba óziniń tıimdiligin kórsetti. Mysaly, aınalma jolmen ótken shamamen 700 kólikti anyqtadyq, sonyń ishinde 200-ge jýyǵy ólsheý júıesine tirkelmegen. Tsıfrlandyrý osyndaı máselelerdi anyq kórsetip otyr, — dedi Nurlan Saýranbaev.
Buǵan deıin Nurlan Saýranbaev Premer-mınıstrdiń birinshi orynbasary aıtqan syn-eskertpelerge pikir bildirgen edi.
