Aýyr júk kólikteri Taldyqorǵan — Óskemen jolyn tozdyryp jatyr
ASTANA. KAZINFORM — Jańadan salynǵan jolda 10 myń sharshy metrden astam jabyndyny qalpyna keltirý qajet, dep habarlaıdy «QazAvtoJol» UK baspasóz qyzmeti.
Abaı oblysynda respýblıkalyq mańyzy bar «Taldyqorǵan — Qalbataý — Óskemen» avtomobıl jolyn qaıta jańartý jumystary aıaqtaldy. Barlyq ýchaske paıdalanýǵa berilip, qazir kepildik merziminde tur. Alaıda jańadan salynǵan jol aýyr salmaqty kólikterdiń júıeli qozǵalysyna baılanysty joǵary júktemege ushyrap otyr.
Ótken jyldan beri júrgizilip kele jatqan monıtorıng barysynda atalǵan baǵytta ınfraqurylymdyq jobany iske asyrý úshin jol-qurylys materıaldaryn tasymaldaıtyn aýyr júk kólikteriniń qozǵalysy qarqyndy ekeni tirkelgen. Júk kólikteriniń úlken massasy, sondaı-aq belgilengen salmaq jáne ostik júkteme parametrleriniń asyp ketýi jol konstrýktsııasyna qosymsha kúsh túsirip, jol jamylǵysynda deformatsııalar paıda bolyp jatyr.
Onyń saldaryn qazirdiń ózinde qalpyna keltirýge týra kelip otyr. Bıyl kóktemde kepildik mindettemeleri aıasynda 5 800 sharshy metr asfaltbeton jamylǵysy qalpyna keltirildi. Tamyz aıynda 720–760 shaqyrym aralyǵyndaǵy ýchaskege júrgizilgen kezekti tekserý nátıjesinde taǵy shamamen 4 500 sharshy metr jol jamylǵysyn qaıta tóseý qajettigi anyqtaldy. Jumystar 25 tamyzda bastalyp, 1 qyrkúıekke deıin 2 600 sharshy metr jol jamylǵysy qalpyna keltirildi. Anyqtalǵan aqaýlardy joıý jumystaryn 5 qyrkúıekke deıin tolyq aıaqtaý josparlanyp otyr.
— Osylaısha, qysqa merzim ishinde jańadan salynǵan jol jamylǵysynyń 10 myń sharshy metrden astam aýmaǵyn qalpyna keltirý máselesi týyndady. Aqaýlardyń paıda bolýyna áser etetin faktorlardyń biri — aýyr salmaqty kólikterdiń qozǵalysy. Ásirese oske túsetin ruqsat etilgen júktemeniń júıeli túrde asyp ketýi jolǵa aıtarlyqtaı keri áser etedi. Sonyń saldarynan jolda oıyq izder, yǵysýlar jáne ózge de deformatsııalar paıda bolyp, jol tóseminiń paıdalaný merzimi qysqarady, — deıdi mamandar.
Kólik quraldarynyń salmaq-gabarıttik parametrlerin baqylaý maqsatynda avtojoldyń 691 jáne 783-shaqyrymdarynda avtomattandyrylǵan ólsheý stantsııalary ornatylǵan. Sonymen qatar «QazAvtoJol» temirjol jelisiniń qurylysyna qatysýshy uıymdarmen jáne ózge de múddeli taraptarmen belgilengen salmaq normalaryn saqtaý máselesin turaqty túrde kóterip keledi.
— Qurylys materıaldaryn tasymaldaıtyn uıymdar men júk kóligi ıelerin belgilengen salmaq jáne ostik júkteme talaptaryn qatań saqtaýǵa shaqyramyz. Artyq júk bir reıste kóbirek júk tasymaldaýǵa múmkindik bergenimen, onyń saldary oıyq izder, deformatsııalar jáne merziminen buryn júrgiziletin jóndeý túrinde kórinis tabady, — dep túıindedi kompanııanyń baspasóz qyzmeti.
Osyǵan deıin Aqtóbede 23 shaqyrymdyq jol jóndeý jumysy bes jylǵa sozylyp ketkenin jazǵanbyz.
