Aýyr júk kólikteri salmaq baqylaýyn endi aınalyp óte almaıdy
ASTANA. KAZINFORM — Áleýmettik jelilerde respýblıkalyq mańyzy bar «Saryózek — Kóktal» avtomobıl jolynyń 7,5-shaqyrymynda ornalasqan avtomattandyrylǵan ólsheý stantsııasyn (AÓS) aýyr júk kólikteriniń aınalyp ótip jatqany kórsetilgen beınejazba tarady. Kadrlarda QAJ logotıpi bar júk kóligi de kórinedi.
«QazAvtoJol» bul kólik kompanııaǵa tıesili emes ekenin naqtylady.
Kompanııanyń málimetinshe, bul ýchaskedegi AÓS tehnıkalyq turǵydan jaramdy jáne qalypty rejımde jumys istep tur. Sonymen qatar beınejazbadan jekelegen júk kólikteriniń avtomattandyrylǵan salmaq-gabarıttik baqylaý júıesin aınalyp ótý úshin oǵan irgeles ornalasqan tehnıkalyq ótkeldi paıdalanǵany kórinedi.
— Atalǵan tehnıkalyq ótkel respýblıkalyq mańyzy bar avtomobıl jolynyń quramyna kirmeıdi, «QazAvtoJoldyń» balansynda joq jáne kompanııa tarapynan salynbaǵan. Ony salý men paıdalanýdyń quqyqtyq negizderine qatysty máseleler kompanııanyń quzyretine kirmeıdi jáne tıisti ýákiletti memlekettik organdar tarapynan quqyqtyq baǵalaýdy talap etedi, — delingen habarlamada.
«QazAvtoJol» buǵan deıin AÓS-ti aınalyp ótýi múmkin baǵyttarǵa birneshe ret kedergiler ornatqan. Alaıda bul kedergiler bógde tulǵalar tarapynan óz betinshe alynyp tastalǵan.
AÓS-ti aınalyp ótýdiń kezekti derekteri anyqtalǵannan keıin kompanııa qosymsha sharalar qabyldady. Búgin arnaıy tehnıkanyń kómegimen atalǵan baǵyt arqyly aýyr júk kólikteriniń ótý múmkindigi tolyqtaı shekteldi.
— AÓS tasymaldaýshylarǵa kedergi keltirý úshin ornatylmaıdy. Onyń negizgi mindeti — kólik quraldarynyń belgilengen salmaq-gabarıttik parametrlerdi saqtaýyn baqylaý jáne avtomobıl joldaryn shamadan tys júktemeden qorǵaý. Artyq júk jolda oıyq izder men deformatsııalardyń paıda bolýyn jedeldetip, jol jamylǵysynyń paıdalaný merzimin qysqartady jáne ony qalpyna keltirýge qosymsha shyǵyndardy talap etedi, — dep habarlady ulttyq kompanııanyń baspasóz qyzmeti.
«QazAvtoJol» avtomobıl joldaryn qorǵaýǵa baǵyttalǵan qajetti ınjenerlik-tehnıkalyq sharalardy qabyldaýdy jalǵastyratynyn málimdedi. Sonymen qatar AÓS-ti qasaqana aınalyp ótý, ornatylǵan kedergilerdi óz betinshe alyp tastaý jáne salmaq baqylaýynan jaltarý maqsatynda bógde joldardy paıdalaný derekterine quzyretti memlekettik organdar tıisti quqyqtyq baǵa berýge tıis.
Eske salaıyq, buǵan deıin «QazAvtoJol» shamadan tys júk Taldyqorǵan — Óskemen jolyn búldirip jatqanyn habarlaǵan edik.
