Aýyr júk kólikteri men jol sapasy máselesi tsıfrlandyrý arqyly sheshilmek

ASTANA. KAZINFORM — Kólik mınıstri Nurlan Saýranbaev jol sapasyn jaqsartý úshin júkti shamadan tys artyq tıep alyp júretin aýyr kólikterge qatysty qandaı shara qoldanylatynyn aıtty.

— Qazaqstan aýmaǵynda 220 avtomattandyrylǵan ólsheý júıesi qoıylyp jatyr. Biraq osyny shaqyrym boıynsha eseptesek, 800 shaqyrymǵa bir ólsheý júıesinen keledi, ıaǵnı jetispeıdi. Ekinshiden, bul máseleni tolyqqandy sheshý múmkin bolmaı tur. Qansha aıtqanymen, avtojoldarda aýyr júk kólikteri júr. Qazirgi jańa tsıfrlandyrý kezeńinde olardy «Sergek» júıesi sııaqty kóretin bolamyz. Tsıfrlandyrý aıasynda tolyq júzege assa, onda baqylaý máselesin sheshýge bolady, — dedi N. Saýranbaev Úkimet otyrysynan keıin tilshiler suraǵyna jaýap bere otyryp. 

Eske salsaq, byltyr maýsym aıynda burynǵy Kólik mınıstri Marat Qarabaev karerde júrýge arnalǵan HOWO jáne SHACMAN kólikterine elimizdiń joldarynda júk tasymaldaýǵa tyıym salynatynyn aıtty. 

Sonymen qatar, QR Kólik mınıstrligi karerlik aýyr júk kólikteriniń jalpyǵa ortaq paıdalanylatyn avtojoldarmen júrýine tyıym salýǵa qatysty túsinik berdi. 
«Avtomobıl kóligi týraly» Zańda 2026 jylǵy 1 qańtardan bastap aýyr júk kólikteriniń ruqsat etilgen jalpy salmaǵy belgilengen normadan asyp ketse, jalpyǵa ortaq paıdalanylatyn avtojoldarda júkterdi tasymaldaýǵa tyıym salý eskerilgen.