Aýyr jáne asa aýyr qylmys jasaǵandardy merziminen buryn bosatý sharty ózgeredi

ASTANA. KAZINFORM – Qazaqstan Respýblıkasynyń Qylmystyq kodeksine birqatar ózgeris engiziledi. Tolyǵyraq Ádilet mınıstrligi qoǵamdyq tártip salasyndaǵy zańnama departamentiniń dırektory Dýman Súleımenov aıtyp berdi.

- Qylmystyq-atqarý zańnamasynda aýyr jáne asa aýyr qylmystar úshin shartty merzimnen buryn bosatý, merzimdi esepteý jáne jazasyn óteýdiń qatań sharttaryna ózgerister engiziledi. Bul degenimiz Qylmystyq kodekstiń 72, 73 jáne 79 baby. Atalǵan shara adam ómiri nemese densaýlyǵyna qarsy qylmystarǵa qatysty quqyq buzýshylyq jasaǵandar úshin jazany kúsheıtýge baǵyttalǵan,- dedi Dýman Súleımenov ortalyq kommýnıkatsııalar qyzmeti alańynda ótken baspasóz máslıhatynda.

Odan ári Ádilet mınıstrliginiń ókili kollektorlar qyzmetiniń jaýapkershiligi kúsheıetinin tilge tıek etti.

- Kollektorlardyń qyzmetin teris paıdalaný jaıttary boıynsha, ıaǵnı qaryzdy óndirýdiń zańǵa jat tásilderin qoldaný, qarjylyq qyzmet tutynýshylardyń quqyǵyn buzý jáne ózge de áreketter úshin jaýapkershilik qataıady (Qylmystyq kodekstiń 251, 252-baptary). Qazir 214 jáne 223-baby kollektorlardy iri zalal keltirý jaǵdaıynda ǵana jaýapqa tartady. Kollektorlar quzyretin jeke paıdasyna nemese úshinshi tulǵa paıdasyna asyra qoldanýy, qoǵamǵa tóngen qaýip. Sondyqtan kollektorlyq agenttik qyzmetkerleriniń mansabyn asyra paıdalaný áreketterine qylmystyq jaýapkershilik engizý usynylady,- dep tolyqtyrdy vedomstvo ókili.

Eske salsaq, jyl basynda Іshki ister mınıstrligi elimizde aýyr qylmys sany aıtarlyqtaı tómendegenin habarlady.