Aýyr soqqy boldy: Rýslan Berdenovke oq atqan kúdiktiniń ákesi málimdeme jasady

ShYMKENT. KAZINFORM – Shymkentte qala ákiminiń orynbasary Rýslan Berdenovke oq atqan kúdikti Ernar Jıembaıdyń ákesi Jıembaı Pralıev resmı málimdeme jasady.

- Qurmetti qazaqstandyqtar, Shymkent qalasynyń turǵyndary, buqaralyq aqparat quraldarynyń ókilderi!

Bizdiń otbasymyzdyń atynan 21 sáýir kúni oryn alǵan qaıǵyly oqıǵaǵa baılanysty sizderge úndeý joldaýdy jón kórdim.

Ata-ana úshin bul jaǵdaı — naǵyz aýyr soqqy boldy. Búginge deıin ulymyz Ernardyń osyndaı qıyn jaǵdaıdyń ortasynda qalǵanyna sene almaı otyrmyz.

Osy oqıǵaǵa baılanysty shyn júrekten ókinishimizdi bildiremiz. Qandaı jaǵdaı bolmasyn, birinshi kezekte Rýslan Berdenovtiń tezirek saýyǵyp ketýin tileımiz.

Biz tergeý men sottyń barlyq jaǵdaıdy ádil, jan-jaqty qarastyratynyna senim artamyz. Barshańyzdy sabyrǵa shaqyryp, naqty sheshim shyqpaı turyp, asyǵys qorytyndy jasamaýdy suraımyz.

Eń bastysy – bul jaǵdaıǵa esh qatysy joq kelinimizdi aralastyrmaýdy ótinemiz. Ol Rýslan Berdenovti buryn-sońdy kórmegen de, tanymaıdy da, - delingen málimdemede.

Ol osy qıyn kúnderi qoldaý bildirip jatqan jandarǵa sheksiz alǵys bildiredi.

- Alda bizdi aýyr kezeń kútip tur, degenmen ádildik pen adamgershilik jeńedi dep úmittenemiz, - degen Jıembaı Pralıev.

Buǵan deıin Rýslan Berdenovtiń qyzmettik mindetin ýaqytsha kim atqaratynyn habarladyq.

Aıta keteıik, Shymkentte qala ákiminiń orynbasary Rýslan Berdenovke qastandyq jasalǵan bolatyn. Kúdikti sheneýnikke qaraı úsh ret oq atqan. Oqıǵa saldarynan ákimdik qyzmetkeri jaraqat alyp, aýrýhanaǵa jetkizildi.

Al, dárigerler Rýslan Berdenovtiń ómirine qaýip tónip turmaǵanyn aıtty. Jasalǵan ota da sátti ótti.

Al, Sársen Quranbek Shymkent ákimi orynbasaryna jasalǵan shabýylǵa qatysty málimetterdi tergeý naqtylaıtynyn aıtty.