Aýyr kólikterge avtojolda júk tasymaldaýǵa qashan tyıym salynady
ASTANA. KAZINFORM – QR Kólik mınıstrligi karerlik aýyr júk kólikteriniń jalpyǵa ortaq paıdalanylatyn avtojoldarmen júrýine tyıym salýǵa qatysty túsinik berdi.
«2022 jyly «Avtomobıl kóligi týraly» Zańda 2026 jylǵy 1 qańtardan bastap aýyr júk kólikteriniń ruqsat etilgen jalpy salmaǵy belgilengen normadan asyp ketse, jalpyǵa ortaq paıdalanylatyn avtojoldarda júkterdi tasymaldaýǵa tyıym salý eskerilgen. Qazirgi kezde mınıstrlik jalpy paıdalanymdaǵy avtojoldar boıynsha aýyr salmaqty (júksiz salmaǵy 12 tonnadan asatyn) osyndaı kóliktermen júkterdi tasymaldaýǵa tyıym salýdy engizý merzimin 2025 jylǵy 1 qańtarǵa aýystyrý bóliginde tıisti jumysty atqaryp jatyr», - delingen mınıstrliktiń Kazinform agenttigine bergen jaýabynda.
Vedomstvo málimetinshe, zańnamalyq túzetýler QR Úkimeti reglamentiniń 124-tarmaǵynyń aıasynda QR Parlamentinde qaralyp jatqan zań jobalary arqyly júzege asyrylady.
«Kórsetilgen is-sharalar arqyly aýyr salmaqty kólik quraldarynyń júrip ótýin baqylaý máselelerin sheshý jáne kóliktik baqylaýdaǵy sybaılas jemqorlyq táýekelderin azaıtý josparlanyp otyr», - dep atalyp ótken Kólik mınıstrligi aqparatynda.
Eske salsaq, bıyl maýsym aıynda QR Kólik mınıstri Marat Qarabaev karerde júrýge arnalǵan HOWO jáne SHACMAN kólikterine elimizdiń joldarynda júk tasymaldaýǵa tyıym salynatynyn aıtty.
