Aýyr atletıkadan Azııa chempıonatynda top jarǵan jas sportshylar elge oraldy

Áýejaıda el maqtanyshtaryn jaqyndary, týǵan-týystary men jankúıerleri ystyq yqylaspen qarsy aldy. Qazaqstan aýyr atletıka federatsııasynyń vıtse-prezıdenti Sergeı Tsyrýlnıkov bul jeńis komandalyq jumystyń, sondaı-aq qazaqstandyq sportshylardyń muqalmas erik-jigeri men qaısar mineziniń nátıjesi ekenin atap ótti.

Tashkentte ótken týrnır qorytyndysy boıynsha qazaqstandyq atletter julqa kóterý, serpe kóterý jáne qossaıys nátıjesi boıynsha jalpy 59 medal jeńip aldy, onyń 19-y altyn. Jalpykomandalyq esepte Qazaqstan quramasy 17 jasqa deıingi qyzdar arasynda jáne 20 jasqa deıingi jasóspirimder arasynda barlyq qatysýshy elderdiń ishinen birinshi oryndy ıelendi.

Sondaı-aq qurlyq birinshiliginde otandyq aýyr atletıka mektebiniń joǵary deńgeıin kezekti márte dáleldegen sportshylar Azııa men álem rekordtaryn jańartty.

Halyqaralyq dárejedegi tóreshi, Azııa aýyr atletıka federatsııasy Tehnıkalyq komıtetiniń tóraıymy Olga Soloveva Tashkenttegi jarys 2028 jylǵy Olımpıada oıyndarynda júldeler sarapqa salynatyn salmaq dárejeleri boıynsha ótkizilgenin jetkizdi. Sondyqtan jas sportshylarymyzdyń nátıjeleri aıryqsha nazar aýdarýǵa turarlyq.

— Qazaqstandyq sportshylardyń kórsetkishterin biz ǵana emes, halyqaralyq deńgeıde de joǵary baǵalap otyr. Azııada aýyr atletıkadan básekelestik qashan da joǵary. Soǵan qaramastan Halyqaralyq aýyr atletıka federatsııasynyń prezıdenti qazir jaqsy nátıje kórsetip júrgen sportshylarymyzdy bizdiń Olımpıadadaǵy bolashaǵymyz dep erekshe atap ótti, — dedi Olga Soloveva.

Áýejaıda sportshylardyń sharshaǵany baıqalsa da, olar shyn júrekten qýanyshty boldy. Óıtkeni artta jeńis jáne júldemen aıaqtalǵan tartysty jarys qalsa, alda jańa maqsattar men josparlar kútip tur.

Snejana Kashkarova 57 kelige deıingi salmaq dárejesinde baq synap, jalpy esepte 5 altyn medal jeńip aldy. Ol julqa kóterýde 88 keli salmaqty baǵyndyrdy.

— Serpe kóterý — meniń myqty tusym bolmaǵandyqtan, sál qıyndaý boldy. Biraq barlyǵy qoldaý kórsetip, senim bildirdi, bul maǵan qosymsha jiger berdi. Osy jyly eresekter arasyndaǵy Qazaqstan chempıonatyna qatysýdy josparlap otyrmyn, — dedi Snejana Kashkarova.

Eske salaıyq, qazaqstandyq aýyr atletter Azııa chempıonatynda 59 medal jeńip aldy.