Aýyr atletıkadan Azııa chempıonatynda Petr Hrebtov qola medal aldy

ASTANA. KAZINFORM - Qytaıdyń Tszıanshan qalasynda ótip jatqan aýyr atletıkadan Azııa chempıonatynda qazaqstandyq Petr Hrebtov (73 keli) qola medal aldy.

Qossaıystyń qorytyndysy boıynsha qazaqstandyq ziltemirshi 333 (146+187) keli salmaqty baǵyndyrdy.

Birinshi oryndy ındonezııalyq Abdýlla Ramat Ervın 360 (155+205) kelimen ıelense, ekinshi orynǵa Qytaıdan Ý Haıfen 334 (145+189) kelimen jaıǵasty.

Qazaqstan aýyr atletıka federatsııasynyń Kazinform aqparat agenttigine usynǵan málimetinshe, el quramasynan 10 mamyrda Vıktor Nadvornyı (67 keli), Sergeı Chýev (67 keli) synǵa tústi.

Búgin, 12 mamyrda Álibek Raqymberdi (81 keli), Asyljan Bektaı (89 keli), Egor Sherer (89 keli) júldelerdi sarapqa salady.

Sondaı-aq 13 mamyrda Araı Nurlybekova (71 keli), Aıanat Jumaǵalı (76 keli), Vıktorııa Novıkova (81 keli), Sergeı Petrovıch (96 keli), Kırıll Staroverkın (96 keli), 14 mamyrda Artem Antropov (102 keli), Aqerke Baımanap (87 keli), 15 mamyrda Lıýbov Kovalchýk (87 keliden joǵary) saıysqa túsedi.

On kúnge sozylatyn qurlyqtyq dodada 200-den astam sportshy jarys jolyna shyǵady. Onyń ishinde 112-i erler, 89-y áıelder arasynda synǵa túsedi.