Aýyr atlet Lıýbov Kovalchýk álem chempıonatynda altynshy orynǵa ıe boldy
ASTANA. KAZINFORM — Qazaqstandyq aýyr atlet Lıýbov Kovalchýk Qytaıdyń Nınbo qalasynda ótip jatqan álem chempıonatyndaǵy jarysyn aıaqtady.
Otandasymyz 86 keliden joǵary salmaq dárejesinde óner kórsetip, qossaıystyń qorytyndysy boıynsha altynshy orynǵa turaqtady.
Kovalchýk julqa kóterýde 116 kelini baǵyndyrsa, serpe kóterýde 147 kelini eńserdi. Osylaısha, sportshynyń jalpy nátıjesi 263 kelini qurady.
Bul salmaqta Qytaı ókili Lı ıAn 317 keli (147+170) nátıjesimen álem chempıony atandy. Ońtústik Koreıa sportshysy Pak He Djon 286 kelimen kúmis medal ıelense, onyń otandasy Kım He En 277 kelini kóterip, qola júldege qol jetkizdi.
Eske salaıyq, buǵan deıin aýyr atlet Artem Antropov álem chempıonatynda úzdik ondyqqa kirgenin jazǵan edik.
