Aýyr atlet Artem Antropov Islam yntymaqtastyǵy oıyndarynda qola júlde aldy

ASTANA. KAZINFORM – Aýyr atletıkadan Qazaqstan quramasynyń ókili Artem Antropov Er-Rııadta (Saýd Arabııasy) ótip jatqan Islam yntymaqtastyǵy oıyndarynda qola medalǵa ıe boldy.

Ulttyq olımpıadalyq komıtettiń málimetinshe, 110 kelige deıingi salmaqta synǵa túsken otandasymyz serpe kóterýde úshinshi nátıje kórsetti. 

Eń úzdik múmkindiginde ol 223 kelini eńserdi. Bul jattyǵýda ózbekstandyq Akbar Djýraev (227 keli) top jarsa, ırandyq Alıreza Nasırı (224 keli) ekinshi oryn aldy.

Aıta keteıik, julqa kóterýde Artem jetinshi orynǵa ıe bolsa, qossaıystyń qorytyndysy boıynsha besinshi orynǵa turaqtady.

Buǵan deıin karateden Qazaqstan quramasynyń ókili Nıkıta Tarnakınniń Islam yntymaqtastyǵy oıyndarynda altyn júlde alǵanyn jazǵan edik.