Aýylǵa jumys isteýge barǵan medıtsına qyzmetkerlerine qandaı kómek kórsetiledi
ASTANA. KAZINFORM – «Aýyldyq densaýlyq saqtaýdy jańǵyrtý» ulttyq jobasy iske asyra bastaǵan sátten bastap aýyldaǵy densaýlyq saqtaý nysandaryna 1 700-den astam medıtsına qyzmetkeri jumysqa ornalastyryldy. Bul týraly Densaýlyq saqtaý mınıstrliginen málim etti.
Vedomstvonyń atap ótýinshe, aýyldaǵy kadr tapshylyǵy máselelerin sheshý úshin memleket tarapynan medıtsına mamandaryn aýyldyq aımaqtarǵa tartý maqsatynda yntalandyrý baǵdarlamalary ázirlenip, iske asyryldy. Medıtsına qyzmetkerlerine mynadaı kómek túrleri kózdelgen:
- aýyldyq jerlerge jumysqa keletin, tapshylyǵy joǵary mamandyqtary bar medıtsına qyzmetkerleri 100 AEK alady.
- «Dıplommen aýylǵa» baǵdarlamasy boıynsha aýyldyq jerlerge jumysqa kelgen jas mamandarǵa:
-100 AEK mólsherinde kóterme járdemaqy tóleý qarastyrylǵan;
- respýblıkalyq bıýdjetten turǵyn úı satyp alýǵa aýdandyq jerlerde syıaqy mólsherlemesi 1% bolatyn 2 500 AEK-ke deıingi, al aýyldarda 2 000 AEK-ke deıingi kredıt jáne basqa da jeńildikter beriledi.
- Búginge deıin barlyǵy 900-ge jýyq áleýmettik qoldaý sharasy kórsetildi. Onyń ishinde kóterme járdemaqy, qyzmettik turǵyn úı berý, turǵyn úı salýǵa/satyp alýǵa jeńildetilgen kredıt berý sharalary jáne áleýmettik qoldaýdyń basqa túrleri (kommýnaldyq qyzmetter, baılanys tólemi jáne t.b.) bar. Jańadan kelgen mamandar úshin beıimdelý jáne kásibı damý protsesinde qoldaý kórsetý men súıemeldeýdi qamtamasyz etetin tájirıbeli jumysshylardyń qatysýymen tálimgerlik júıesi uıymdastyrylady. Densaýlyq saqtaý ınfraqurylymyn damytýdyń óńirlik perspektıvalyq josparlaryna sáıkes, medıtsınalyq nysnadarǵa qajettilik halyq sany, medıtsınalyq kómekke degen suranys, eldi mekenderdiń ornalasý erekshelikteri jáne medıtsınalyq-sanıtarııalyq alǵashqy kómek kórsetý qaǵıdaty eskerile otyryp, jergilikti atqarýshy organdarmen aıqyndalady. Sondaı-aq medıtsınalyq kómektiń qoljetimdiligin arttyrý maqsatynda Infraqurylymdy damytý qorynyń qarajaty jáne respýblıkalyq bıýdjet qarajaty esebinen 20 dan astam medıtsınalyq-sanıtarııalyq alǵashqy kómek nysanyn salý josparlanǵan, - dep atap ótedi mınıstrlikten agenttiktiń resmı saýalyna oraı.
Buǵan deıin kópbeıindi ortalyq aýdandyq aýrýhanalardy jańǵyrtý bıyl aıaqtalatynyn jazǵan edik.
