Aýylǵa baryp, 5 jyl jumys istemegen: BQO-da jas mamandar 36 mln teńgeni qaıtarady
ASTANA. KAZINFORM — Batys Qazaqstan oblysynyń Jánibek aýdanynda aýylǵa jumysqa kelgen jas mamandar áleýmettik qoldaý retinde alǵan qarajatty qaıtarmaǵan. Bul týraly aýdan prokýratýrasynyń tekserýi barysynda anyqtaldy.
— Shart boıynsha, áleýmettik qoldaý alǵan mamandar aýyldyq eldi mekende keminde bes jyl jumys isteýge mindetti bolǵan. Alaıda olardyń keıbiri bul talapty oryndamaı, óz erkimen jumystan shyǵyp ketken. Sonymen qatar bıýdjet qarajatyn qaıtarmaǵan, — delingen vedomstvo taratqan aqparatta.
Prokýratýranyń talap aryzdary sotta qanaǵattandyryldy. Qazirgi ýaqytta qarajatty májbúrlep óndirý úshin atqarý qujattary sot oryndaýshylaryna joldanǵan.
Prokýratýra bıýdjet qarajatynyń zańdy ári maqsatty paıdalanylýyn baqylaýdy jalǵastyrady.
Osydan buryn ShQO-da «Dıplommen aýylǵa» baǵdarlamasymen aqsha alǵandar mindettemesin oryndamaǵanyn jazdyq.
