Aýylǵa barǵan erli-zaıypty dárigerlerge 20 mln teńge járdemaqy beriledi — Jetisý
ASTANA. KAZINFORM — Jetisý oblysynda aýylǵa jumys isteýge barǵan dárigerlerge qandaı jaǵdaı jasalady? Bul saýalǵa óńir ákimi Beıbit Isabaev jaýap berdi.
— Kadr máselesi tek bizdiń aımaqta ǵana emes, Qazaqstanda tapshy. Onyń eki sebebi bar, barǵan kezde turǵyn úıi joq, ekinshi járdemaqy berilmeıdi, berilse az. Aýyldaǵy dárigerlerdiń jalaqysy byltyrǵa qaraǵanda ósti, biraq jetińkiremeıdi, sondyqtan kelmeıtin. Bizdiń oblysta 341 dáriger tapshy bolǵan, máseleni sheshý úshin aýyldyq jerge kóship kelgen dárigerge bıyl 1 qańtardan bastap bıýdjetten 10 mln teńge kóterme aqsha beriledi, eger de erli-zaıypty dárigerler kóship kelsek, 20 mln teńge járdemaqy beriledi, — dedi Beıbit Isabaev óńirdiń áleýmettik-ekonomıkalyq damýy týraly esep bere turyp.
Ákim usynǵan málimetke súıensek bıyl Jetisý óńirine 170 jas dáriger maman jumysqa keldi.
— Byltyr biz 262 mln teńge bólip, ınternatýrada oqyp jatqan stýdentterdiń oqýynyń aqshasyn tólep berdik. Olarmen oqýyn bitirgen soń, bizdiń óńirge kelesiz degen kelisimge keldik. Kelesi jyldyń bıýdjetinde qalalyq jerge kelgen dárigerlerge 5 mln teńge, aýylǵa barǵan dárigerlerge 10 mln teńge járdemaqy berý qarastyrylǵan. Meniń oıymsha, kadr tapshylyǵy bir-eki jyldyń ishinde sheshimin tabady, — deıdi ol.
Buǵan deıin Jetisý oblysynda 2,6 trln teńgege 189 ınvestıtsııalyq joba qolǵa alynǵany aıtyldy.
Sondaı-aq Beıbit Isabaev bıyl 11 aıda negizgi ındıkatorlar boıynsha jospar artyǵymen oryndalǵanyn málimdedi.