Aýylǵa baratyn dárigerlerge qandaı qoldaý tetikteri qarastyrylǵan
ASTANA. KAZINFORM — Aýyldarda dáriger tapshylyǵy máselesi sheshildi me? Qaı óńirlerde dárigerler jetispeı jatyr? Bul suraqtarǵa Densaýlyq saqtaý mınıstrligi jaýap berdi.
Resmı statıstıkalyq derekterge sáıkes, 2026 jylǵy 1 qańtardaǵy jaǵdaı boıynsha Qazaqstanda dárigerler tapshylyǵy 3 869 maman boldy. Onyń ishinde aýyldyq jerde – 803 adam. Bul turǵyda aýyldar boıynsha eń joǵary tapshylyq Túrkistan (144), Mańǵystaý (102), Soltústik Qazaqstan (92), Aqmola (83), Batys Qazaqstan (60) oblystarynda baıqaldy.
- «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» 2024 jylǵy 19 sáýirdegi Zańyna sáıkes, aýyldyq jerlerde keminde bes jyl jumys isteý úshin kelgen asa tapshy mamandyqtar boıynsha medıtsınalyq qyzmetkerlerge 100 eń tómengi jalaqy mólsherinde birjolǵy aqshalaı tólem beriledi, bul qarastyrylyp otyrǵan kezeńde 8,5 mln teńge boldy. Sonymen qatar 2001 jylǵy 23 qańtardaǵy «Qazaqstan Respýblıkasynda jergilikti memlekettik basqarý jáne ózin-ózi basqarý týraly» Zańyna sáıkes, atalǵan tólemderdi qarjylandyrýdy qamtamasyz etý jáne tıisti sheshimderdi qabyldaý jergilikti atqarýshy organdardyń quzyretine jatady, - delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, aýyldy jerlerde jumys isteýge jiberilgen 529 medıtsınalyq qyzmetker birjolǵy (8,5 mln teńgeden) tólemdi aldy. Al 2024 jyly 254 mamanǵa osy tólem berilgen.
- Sondaı-aq 2025 jyly 1760 dárigerge áleýmettik qoldaý sharalary kórsetildi. Onyń ishinde qyzmettik turǵyn úımen qamtamasyz etý (727 dáriger), kóterme járdemaqy, bıýdjettik kredıt berý, kommýnaldyq shyǵyndardy óteý jáne ózge de jeńildikter bar, sonyń arasynda aýyldyq jerlerge kelgen 1005 dáriger qamtyldy. Budan bólek, medıtsınalyq qyzmetkerler úshin kelesi áleýmettik qoldaý sharalary qarastyrylǵan:
- 2024 jylǵy 1 qańtardan bastap áleýmettik qoldaý aıasynda aýdan ortalyǵy sanalatyn aýyldy eldi mekenderge kelgen mamandar úshin turǵyn úı satyp alýǵa nemese salýǵa beriletin bıýdjettik kredıt mólsheri 2 500 AEK-ke deıin, al ózge aýyldy eldi mekender úshin 2 000 AEK-ke deıin ulǵaıtyldy;
- aýyldy jerlerge jumys isteýge jáne turýǵa kelgen mamandarǵa júz aılyq eseptik kórsetkish mólsherinde kóterme járdemaqy tólenedi;
- medıtsınalyq qyzmetkerlerdiń balalaryna turǵylyqty jeri boıynsha mektepke deıingi uıymdardan oryndar basym tártippen beriledi;
- kólik shyǵyndary óteledi;
- medıtsınalyq qyzmetkerlerdiń kásibı jaýapkershiligi saqtandyrylady. Eńbek kodeksiniń 139-babyna sáıkes aýyldy jerlerde jumys isteıtin densaýlyq saqtaý salasynyń mamandaryna jergilikti ókildi organdardyń sheshimi boıynsha laýazymdyq jalaqylary men tarıftik mólsherlemeleri keminde 25 paıyzǵa arttyrylyp belgilenedi.
Budan buryn habarlanǵandaı, 2025 jyly elimizdegi medıtsınalyq joǵary oqý oryndaryn 10,5 myń maman támamdady, olardyń 34%-y aýyldardaǵy medıtsınalyq uıymdarǵa bólindi. Bul 2024 jylmen salystyrǵanda shamamen eki ese joǵary.
