Aýyldyń densaýlyq saqtaý ınfraqurylymy 2030 jylǵa deıin kezeń-kezeńimen jańartylady - mınıstr

ASTANA. KAZINFORM – Densaýlyq saqtaý mınıstri Aqmaral Álnazarova aýyldaǵy medıtsınalyq kómektiń búgingi ahýalymen tanystyrdy.

- Problemalar joq emes, bar. Shyn máninde aýyldyq jerlerdegi tozyǵy jetken ınfraqurylymǵa baılanysty ótken jyly maýsymda Úkimet qaýlysymen tıisti tujyrymdama qabyldandy. Sonyń ishinde 2030 jylǵa deıin kezeń-kezeńimen ınfraqurylymdy jańartý qarastyrylǵan, - dedi Aqmaral Álnazarova Májiliste MÁMS júıesi týraly zań jobasyn tanystyrý barysynda Májilis depýtattarynyń saýalyna jaýap bere turyp.

Mınıstrdiń málimetinshe, búginde el aýmaǵynda 655 eldi mekende medıtsınalyq mekemeniń qurylysy júrip jatyr.

- Onyń ishinde 464 mekeme iske qosyldy, bıyl 180-nen astamyn taǵy iske qosamyz. Odan bólek, ótken jyly kadr máselesine qatysty zańǵa tıisti ózgerister engizilip, aýylǵa baratyn tapshy medıtsına mamandaryna kórsetiletin kómektiń deńgeıi 8,5 mln teńgege deıin kóterildi, - deıdi vedomstvo basshysy.

Buǵan deıin Aqmaral Álnazarova 2027 jyldan bastap jedel járdem qyzmeti boıynsha jańa norma engiziletinin málimdegen edi.

Odan bólek Densaýlyq saqtaý mınıstri medıtsına salasyna ınvestıtsııa quıǵysy keletin kásipkerlerge jol ashyq ekenin jetkizdi.

Aıta keteıik, búgin Májiliste «Mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótti.