Aýyldyqtarǵa 1%-dyq ıpoteka kerek — Májilis

ASTANA. KAZINFORM — Májilis depýtaty Serik Egizbaev Premer-mınıstr Oljas Bektenovtiń atyna saýal joldap, 1%-dyq aýyl ıpotekasyn iske qosýdy usyndy. 

— «Aýyl» partııasy fraktsııasy aýyldy qaıta jańǵyrtýǵa arnalǵan keshendi ulttyq baǵdarlama qabyldaý máselesin alǵa qoıyp otyr. Ol eń aldymen memlekettik baǵdarlamalar men memlekettik-jekeshelik áriptestik arqyly aýyl turǵyndary úshin qoljetimdi turǵyn úı salýdy jedeldetýdi; aýyl ıpotekasyn 1%-ben iske qosýdy; áleýmettik jáne kommýnaldyq ınfraqurylymdy damytýǵa jańa serpin berýdi qamtıdy. Aýyl turǵyndary kún saıyn qarapaıym ómir súrý jaǵdaıy úshin kúrespeýge tıis, — dedi ol.

Depýtat keltirgen derekke súıensek, keıingi 20 jyldyń ishinde 1400-den astam aýyl joıylyp ketken. Al Úkimettiń baǵalaýy boıynsha taǵy 500 aýyl «perspektıvasy joq» eldi mekender qataryna engizilip otyr.

— Depýtattarmen kezdeskende fermerler birinshi kezekte mamandandyrylǵan agrobankti qurý jáne kvotalardy ulǵaıtyp, ótinimderdi qaraý merzimderin 2 aıdan 10 jumys kúnine deıin qysqartý arqyly maýsymdyq aýyl sharýashylyǵy jumystaryna sheteldik jumys kúshin tartýdy ońaılatý jáne memlekettik bajdy jeke tulǵalar úshin qoldanylatyn deńgeıde belgileý máselelerin sheshýdi suraıdy, — deıdi Serik Egizbaev.

Sondaı-aq, búgin Májilis bank qyzmeti týraly zań jobasymen jumys bastady.