Aýyldyq jerlerdegi «Qazposhta» bólimsheleri memlekettik qyzmetter kórsetýi múmkin

ASTANA. KAZINFORM – Aýyldyq jerlerdegi «Qazposhta» bólimshelerine memlekettik qyzmetterdi kórsetý fýnktsııasy júktelýi múmkin. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan.

Onyń atap ótýinshe, «Azamattarǵa arnalǵan úkimet» memlekettik korporatsııasy halyqqa qyzmet kórsetý bólimderiniń sany men ornalasýynyń qoldanystaǵy talaby eldi mekenderge arnalǵan Óńirlik standarttar júıesinde bekitilgen. Qazirgi ýaqytta seriktes uıymdardyń Halyqqa qyzmet kórsetý ortalyqtaryna tartylatyndyǵyna baılanysty atalǵan normatıvtik-quqyqtyq aktilerge ózgertýler engizý josparlanbaǵan.

— Halyqqa qyzmet kórsetý ortalyqtarynyń ınfraqurylymy joq eldi mekenderde memlekettik qyzmetterdiń qoljetimdi núktelerin arttyrý maqsatynda «Qazposhta» AQ-tyń fılıal jelilerin paıdalaný múmkindigi pysyqtalyp jatyr. Atalǵan uıymnyń shamamen 2 myń poshta bólimshesin qamtıtyn aýyldyq jerlerdegi aýqymdy poshta jelisine ıelik etetindigin esker otyryp, sol nysandardy memlekettik qyzmetter kórsetýge paıdalaný múmkindigin qarastyrý josparlanǵan, — dedi Roman Sklıar.

Buǵan deıin 2025 jyldyń 1-toqsanynda Halyqqa qyzmet kórsetý ortalyqtaryna seriktes uıymdar engiziletindigin jazǵan edik.