Aýyldyq jerlerdegi dárigerlerge áleýmettik qoldaý kólemi eki ese ósti
ASTANA. KAZINFORM — 2025 jyly Qazaqstanda aýyldyq jerlerde asa tapshy mamandyqtar boıynsha jumysqa ornalasqan dárigerlerge kórsetiletin áleýmettik qoldaý kólemi eki esege — 2,2 mlrd teńgeden 4,5 mlrd teńgege deıin ulǵaıtyldy, dep habarlaıdy Densaýlyq saqtaý mınıstrligi.
Sonymen qatar, shamamen 24 myń medıtsına qyzmetkeri respýblıkalyq jáne jergilikti bıýdjetterdiń esebinen biliktiligin arttyrdy.
— Medıtsına qyzmetkerlerin qoldaý — memlekettik saıasattyń negizgi basymdyqtarynyń biri. Memleket basshysynyń tapsyrmasy boıynsha biz áleýmettik qorǵaý sharalaryn júıeli túrde kúsheıtip, dárigerlerimizdiń kásibı ósýi men ómir sapasyn arttyrýǵa jaǵdaı jasaýdamyz. Búginde júrgizilgen jumystyń naqty nátıjeleri týraly aıtýǵa bolady. Dáriger áleýmettik turǵydan qorǵalǵan, kásibı damý múmkindikterimen qamtamasyz etilgen jáne óńirlerde jumys isteýge yntalandyrylǵan model qalyptasty. Bizdiń strategııalyq mindetimiz — dáriger mamandyǵyn eldegi eń bedeldi ári áleýmettik jaǵynan qorǵalǵan kásipterdiń birine aınaldyrý, — dep atap ótti Densaýlyq saqtaý mınıstri Aqmaral Álnazarova.
Osylaısha, 2025 jyly 529 dáriger shamamen 4,5 mlrd teńge kóleminde áleýmettik qoldaý aldy, al 2024 jyly 254 dárigerge 2,2 mlrd teńge bólingen bolatyn.
Budan bólek, medıtsına qyzmetkerleri úshin qosymsha áleýmettik qoldaý sharalary, onyń ishinde:
• aýdan ortalyǵy bolyp tabylatyn aýyldyq eldi mekenderge kelgen mamandarǵa turǵyn úı satyp alý nemese salý úshin 2500 AEK, al basqa aýyldyq eldi mekenderge — 2000 AEK mólsherinde bıýdjettik kredıt berý;
• aýyldyq eldi mekenderge jumys isteý jáne turý úshin kelgenderge júz aılyq eseptik kórsetkish mólsherinde kóterme járdemaqy tóleý; •medıtsına qyzmetkerleriniń balalaryna turǵylyqty jeri boıynsha mektepke deıingi uıymdardan basym tártippen oryn berý;
• qyzmettik mindetterin atqarý kezinde qaza tapqan nemese múgedektik alǵan medıtsına qyzmetkerleriniń balalaryn joǵary oqý oryndaryna konkýrstan tys qabyldaý;
• alynǵan medıtsınalyq mamandyq boıynsha áskerı qyzmetten ótý nemese áskerge shaqyrýdan keıinge qaldyrý berý;
• kólik shyǵyndaryn óteý;
• jergilikti máslıhattar tarapynan kadrlardy yntalandyrý boıynsha qosymsha sharalar qabyldaý, onyń ishinde qosymsha sýbsıdııalar berý, baılanys qyzmetterin tóleý, jaldaý aqysy men kommýnaldyq shyǵyndardy ishinara óteý kózdelgen.
2025 jyly 1760 dáriger qyzmettik turǵyn úımen (727 dáriger), kóterme járdemaqymen (1714 dáriger), kommýnaldyq shyǵystardy óteýmen jáne basqa da jeńildiktermen (210 dáriger) qamtyldy, onyń ishinde aýyldyq jerlerge kelgen 1005 dáriger bar.
Medıtsına qyzmetkerleriniń quqyqtaryn qorǵaýǵa baǵyttalǵan 2026–2028 jyldarǵa arnalǵan áleýmettik áriptestik jónindegi salalyq kelisimge kásipodaqtar men jumys berýshiler qol qoıdy.
Mamandyqtyń bedelin arttyrý maqsatynda «Qazaqstannyń eńbek sińirgen dárigeri» qurmetti ataǵy engizildi, oǵan 1000 AEK mólsherinde birjolǵy yntalandyrý tólemi qarastyrylǵan.
Sonymen qatar, «Mamandyǵy boıynsha úzdik» respýblıkalyq konkýrsynyń jeńimpazdaryna 500 AEK kóleminde syıaqy belgilengen (2025 jyly ony 17 adam aldy).
Budan buryn otandyq dáriger ushaqta esinen tanyp qalǵan ózbekstandyq jolaýshyny aman alyp qalǵanyn jazǵan edik.
