Aýyldyq poshta qyzmetin sýbsıdııalaýǵa 500 mln teńge bólinedi – Oljas Bektenov
ASTANA. KAZINFORM –Premer-Mınıstr Oljas Bektenov Senat depýtattarynyń «Qazposhta» AQ qyzmetine qatysty saýalyna jaýap berdi.
Úkimet basshysy aýyldyq jerlerde baılanystyń ámbebap qyzmetterin sýbsıdııalaý máselesine toqtalyp, 2026 jyly bul maqsatqa 500 mln teńge qarastyrylǵanyn málimdedi. Onyń aıtýynsha, atalǵan baǵyt boıynsha qosymsha qarjylandyrý qajettiligi de bar.
– Jasandy ıntellekt jáne tsıfrlyq damý mınıstrligi poshta baılanysynyń ámbebap qyzmetterine qosymsha qajettilik retinde 2,8 mlrd teńge kóleminde bıýdjettik ótinim qalyptastyrdy. Bul ótinim Bıýdjet kodeksinde belgilengen tártippen ýákiletti organdardyń qaraýyna usynylady, – delingen jaýapta.
Aıta keteıik, 2025 jyly sýbsıdııalardyń jalpy kólemi 2 mlrd teńge bolǵan. «Baılanys týraly» zańǵa sáıkes, sýbsıdııa mólsheri shyǵystar men ámbebap qyzmetterdi kórsetýden túsken naqty kirister arasyndaǵy aıyrma retinde aıqyndalady jáne respýblıkalyq bıýdjette kózdelgen somadan aspaýǵa tıis.
Sonymen qatar qoldaýdyń balamaly tetikterin engizý baǵytynda da jumys júrgizilip jatyr. Atap aıtqanda, 2025 jylǵy qarashada «Poshta týraly» zańǵa ózgerister engizilip, Qazaqstan Respýblıkasynyń Ulttyq Banki aıqyndaıtyn tártippen «Qazposhta» AQ-nyń aýyldyq eldi mekenderge qolma-qol aqsha jetkizý shyǵyndaryn óteý tetigi qarastyrylǵan.
Osy mehanızm aıasynda 2026 jylǵy aqpan aıynda Ulttyq Bank tarapynan «Qazposhta» AQ-nyń 2025 jylǵa arnalǵan 3,5 mlrd teńge kólemindegi shyǵyny óteldi.
Budan bólek, Samuryq-Qazyna kompanııalar tobyna kiretin uıymdar bos qarajattaryn «Qazposhta» AQ shottarynda ornalastyryp, qosymsha tabys qalyptastyrýǵa múmkindik beredi.
– Sondaı-aq, jeke kompanııalardyń memlekettik satyp alýlarǵa qatysýy kezinde ótinimderdi qamtamasyz etý úshin «Qazposhta» AQ-nyń eskroý-shottaryn paıdalaný múmkindigi qarastyrylyp jatyr, – delingen qujatta.
Buǵan deıin, Mádenıet jáne aqparat mınıstrligi «Qazposhtamen» merzimdi basylymdardy jetkizý tarıfi boıynsha ortaq mámlege kelmese, Úkimet deńgeıinde talqylaýy múmkin ekenin jazǵanbyz.
