Aýyldyq okrýgter deńgeıinde ókildi organ quryla ma – Úkimet basshysynyń jaýaby

ASTANA. KAZINFORM – Senat depýtattarynyń saýalyna jaýap bergen Premer-mınıstr Oljas Bektenov aýyldyq okrýgter deńgeıinde ókildi organ qurylmaıtynyn aıtty. 

– «Eldi meken» uǵymy «Qazaqstan Respýblıkasynyń ákimshilik-aýmaqtyq qurylysy týraly» Zańda bekitilgen. Eldi mekenderdiń sanattaryn ózgertý tártibi de qoldanystaǵy zańnamada rettelgen. Bekitilgen Ádistemege sáıkes, jyl saıyn aýyldardyń áleýmettik-ekonomıkalyq damýyna monıtorıng júrgiziledi. Aýyldyq eldi mekenniń damý áleýeti ekonomıkalyq, ınfraqurylymdyq, demografııalyq jáne geokeńistiktik ólshemsharttar negizinde aıqyndalady, - dedi Premer-mınıstr.

Úkimet basshysynyń atap ótýinshe, aýyldyq okrýgter deńgeıinde ókildi organ qurý máselesi buryn pysyqtalǵan. Alaıda jergilikti ózin-ózi basqarý organdaryn damytýdyń osy kezeńinde jergilikti qoǵamdastyq pen memlekettiń ózara is-qımylynyń qoldanystaǵy tetikterin saqtaý týraly sheshim qabyldanǵan.

– Máselen, jergilikti ózin-ózi basqarý organdarynyń qoldanystaǵy modeli bir mandatty saılaý okrýgteri boıynsha máslıhat depýtattaryn saılaýdy kózdeıdi. Budan basqa, aýyl turǵyndary jergilikti qoǵamdastyq jıyndary men jınalystary aıasynda jergilikti mańyzy bar máseleler boıynsha talqylaýǵa jáne sheshimder shyǵarýǵa tikeleı qatysady. Osylaısha, jergilikti ózin-ózi basqarý organdarynda aýyldyq okrýgterdiń de, aýyldardyń da múddelerin bildirýi qamtamasyz etilgen, - dedi Oljas Bektenov.

Buǵan deıin aýyldyq okrýgterdiń bıýdjetine jekelegen salyq túsimderin berý máselesi pysyqtalyp jatqanyn jazǵan edik.