Aýyldyq okrýg ákimderiniń quzyretinen qandaı fýnktsııalar alynady

ASTANA. KAZINFORM — Aýyldyq okrýg ákimderiniń quzyretine jatpaıtyn 11 fýnktsııany alyp tastaý máselesi pysyqtalyp jatyr. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

— Qazirgi ýaqytta oblystyq mańyzy bar qalalar, aýyldar, kentter, aýyldyq okrýgter (budan ári — aýyldyq okrýg) ákimderiniń fýnktsııalaryn ózektilendirý, ońtaılandyrý jáne qaıtalanatyn ne olarǵa tán emes fýnktsııalardy alyp tastaý maqsatynda keshendi taldaý júrgizilýde. Osy jumys aıasynda 17 kodekstiń jáne 100-ge jýyq zańnyń erejeleri taldandy. Onyń qorytyndysy boıynsha aýyldyq okrýg ákimderine júktelgen 170-ke jýyq fýnktsııa anyqtaldy, — dedi Úkimet basshysy.

Onyń atap ótýinshe, aýyldyq okrýg ákimderiniń qyzmeti, birinshi kezekte, eldi mekenderdi abattandyrýǵa, sanıtarııalyq jaǵdaıdy qamtamasyz etýge, sondaı-aq jergilikti deńgeıdegi áleýmettik máselelerdi úılestirýge baǵdarlanǵan.

— 2025 jylǵy jeltoqsanda aýyldyq okrýg ákimderiniń qatysýymen Úkimet deńgeıinde birqatar keńes ótkizildi. Talqylaý aıasynda aýyldyq okrýg ákimderiniń quzyretine jatpaıtyn 11 fýnktsııany alyp tastaý usynyldy. Onyń ishinde qylmystyq-atqarý júıesi mekemelerinen bosap shyqqan jáne probatsııadaǵy adamdardyń jumysqa ornalasýyna járdemdesý, jekelegen ákimshilik quqyq buzýshylyqtardy qaraý, densaýlyq saqtaý uıymdarynyń statsıonarlarynda jatqan naýqastardy turǵylyqty jerine tasymaldaýdy uıymdastyrý jáne basqalary bar. Ázirlengen túzetýler Májiliste qaralyp jatqan «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasy aıasynda pysyqtalady, — dedi Premer-mınıstr.

Aıta keteıik, Prezıdent Qasym-Jomart Toqaev aýyl ákimderiniń dıalog-platformasynda aýyldyq okrýg ákimderi ózderiniń keńeıtilgen ókilettikterin tolyq iske asyryp, salyq túsimderin ulǵaıtý maqsatynda qoldanystaǵy aqparattyq platformalarmen jumys isteı bilýi qajet ekenin aıtqan bolatyn.