«Aýyldyq densaýlyq saqtaýdy jańǵyrtý» jobasy aıasynda medıtsınalyq nysan salý jospary 100 paıyz oryndaldy
ASTANA. KAZINFORM — «Aýyldyq densaýlyq saqtaýdy jańǵyrtý» ulttyq jobasy aıasynda josparlanǵan medıtsınalyq-sanıtarııalyq alǵashqy kómek nysandary 100 paıyz salyndy. Bul týraly Densaýlyq saqtaý mınıstrliginen málim etti.
— Qazaqstan Respýblıkasy Prezıdentiniń 2022 jylǵy 1 qyrkúıektegi Qazaqstan halqyna arnaǵan «Ádiletti memleket. Birtutas ult. Berekeli qoǵam» atty Joldaýyn iske asyrý sheńberinde aýyl turǵyndaryna kórsetiletin medıtsınalyq kómektiń deńgeıin arttyrý maqsatynda Qazaqstan Respýblıkasy Úkimetiniń 2022 jylǵy 30 qarashadaǵy № 962 qaýlysymen «Aýyldyq densaýlyq saqtaýdy jańǵyrtý» pılottyq ulttyq jobasy bekitildi. Ulttyq joba aýyldyq jerlerdegi medıtsınalyq ınfraqurylymdy keshendi túrde jaqsartýǵa baǵyttalǵan. Ulttyq jobanyń negizgi basymdyǵy jańa medıtsınalyq nysandardy salýmen qatar, medıtsınalyq kómektiń qoljetimdiligin arttyrýǵa, aýdandyq aýrýhanalardy jańǵyrtýǵa jáne olardy bilikti kadrlarmen qamtamasyz etýge baǵyttalǵan, — dep atap ótti mınıstrlikten agenttiktiń resmı saýalyna bergen jaýabynda.
Ulttyq jobada qoıylǵan maqsatqa qol jetkizý úshin mynadaı úsh negizgi mindet kózdelgen:
— aýyldyq eldi mekenderdi normatıvterge sáıkes medıtsınalyq-sanıtarııalyq alǵashqy kómek uıymdarymen qamtamasyz etý;
— aýyl turǵyndaryna ýaqytyly shuǵyl medıtsınalyq kómek kórsetýdi ulǵaıtý;
— aýyldaǵy densaýlyq saqtaý nysandaryn medıtsına kadrlarymen qamtamasyz etý.
— Osylaısha, joba medıtsınalyq nysandardy salýdy, medıtsınalyq jabdyqtarmen qamtamasyz etýdi, kadrlyq áleýetti nyǵaıtýdy jáne medıtsınalyq kómektiń qoljetimdiligin arttyrýdy qamtıtyn keshendi jańǵyrtýǵa baǵyttalǵan. Búginde joba aıasynda josparlanǵan 655 MSAK nysanynyń barlyǵynyń qurylysy aıaqtaldy. Olardyń ishinde 260 medıtsınalyq pýnkt, 235 feldsherlik-akýsherlik pýnkt jáne 160 dárigerlik ambýlatorııa bar. Bul rette Ulttyq jobada josparlanǵan 655 nysannyń ishinen 427-si tozǵan, avarııalyq jaǵdaıdaǵy qoldanystaǵy ǵımarattardyń ornyna, 208 nysan buryn menshikti ǵımaraty bolmaǵandyqtan medıtsınalyq qyzmetter úıge kelý arqyly kórsetilgen aýyldyq eldi mekenderde, 20 nysan medıtsınalyq nysan men medıtsına qyzmetkerleri bolmaǵan aýyldyq eldi mekenderde salyndy, — dep naqtylady vedomstvodan.
Buǵan deıin densaýlyq saqtaý júıesinde lıtsenzııasyz jumys istegen 40 uıym anyqtalǵanyn jazǵan edik.
