Aýyldyq aımaqtardy damytýǵa arnalǵan qoldaýdy bir baǵdarlamaǵa biriktirý kerek – Memleket basshysy

ASTANA. KAZINFORM — Aýyl halqy qarjylyq jáne memlekettik qyzmetterden qol úzip qalmaýy kerek. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.

- Aýyldy damytýǵa arnalǵan negizgi mindetterge arnaıy toqtalǵym keledi. Bul jerde ınfraqurylymdy jańǵyrtýǵa jáne bıznesti qoldaýǵa basymdyq berilýi kerek. Aýyldyq aımaqtardy jan-jaqty damytýǵa arnalǵan memlekettik qoldaý sharalarynyń bárin bir baǵdarlamaǵa biriktirý durys sheshim bolmaq, ıaǵnı «Aýyl amanaty», «Aýyl – el besigi» jáne taǵy basqa baǵdarlamalar. Úkimet pen ákimderden jańa, júıeli ári tyń tásilder kútemin, - dedi Qasym-Jomart Toqaev.

Prezıdenttiń aıtýynsha, aýyl sharýashylyǵynda sheshilmegen máseleler az emes. Fermerler, sarapshylar túrli túıtkilder týraly jazyp jatyr. Mysaly, bordaqylaý oryndary malsyz, jartylaı bos tur, sebebi, mal kórshi elderge tómen baǵamen satylyp jatyr.

- Aýyldaǵy aǵaıynnyń turmys sapasyna yqpal etetin barlyq máselege basa mán berý qajet. Aýyl halqy qarjylyq jáne memlekettik qyzmetterden qol úzip qalmaýy kerek. Qazir bul mindet, negizinen, «Qazposhta» arqyly oryndalyp jatyr. Úkimetke ákimdiktermen birlesip, poshta bólimsheleriniń shalǵaı eldi mekenderde úzdiksiz jumys isteýin qamtamasyz etýdi tapsyramyn, - dedi Memleket basshysy.

Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Otyrys barysynda Úkimet jergilikti zaýyttarmen ofteık-kelisim arqyly qural-jabdyq óndirisin jolǵa qoıatyny aıtyldy.