Aýyldyq aımaqtarda 254 medıtsına qyzmetkeri jetispeıdi
ASTANA. KAZINFORM – «Aýyldyq densaýlyq saqtaýdy jańǵyrtý» pılottyq ulttyq jobasynyń sheńberinde 556 medıtsınalyq-sanıtarııalyq alǵashqy kómek nysany salynady dep josparlanyp otyr. Bul týraly Densaýlyq saqtaý mınıstrliginiń baspasóz qyzmeti málim etti.
Vedomostvonyń habarlaýynsha, 2023 jyly 92 MSAK obektisiniń qurylysy aıaqtaldy, 7 joba merzimderin buza otyryp aıaqtalady. Búgingi tańda 239 joba boıynsha JSQ bar, 317 joba memlekettik saraptamanyń qaraýynda.
«Búgingi tańda ákimdikter konkýrstar ótkizip, nysandardy salýǵa 109 shart jasasty, onyń ishinde 99 obektige JAO-ny qosa qarjylandyrý kózdelgen (10%), bul rette respýblıkalyq bıýdjetten 58 nysan qarjylandyrýmen qamtamasyz etilgen» — delingen habarlamada.
Mınıstrliktiń málimetinshe, 2024 jylǵa arnalǵan qosymsha qarjylandyrý qajettiligi 498 MSAK nysanyn salýǵa 99,6 mlrd. teńgeni quraıdy.
Ulttyq jobanyń ekinshi mindetiniń sheńberinde 32 aýdandyq aýrýhanany jańǵyrtý boıynsha jumys júrgizilip jatyr.
Ulttyq jobanyń sheńberinde 32 kópbeıindi aýdandyq ortalyq aýrýhanany materıaldyq-tehnıkalyq jaraqtandyrýǵa 33,6 mlrd. teńge kóleminde qarajat bólinbekshi.
«2023 jyly dıagnostıkalyq jabdyqty (ÝDZ), zerthanalyq jabdyqty, reanımatsııalyq jabdyqty, rentgen-dıagnostıkalyq, fızıoterapııalyq, hırýrgııalyq jáne endoskopııalyq beıneaqparattyq jabdyqty qosa alǵanda, jalpy somasy 10,5 mlrd teńgege 1800 birlik medıtsınalyq tehnıka satyp alyndy. 2024-2025 jyldary 23,1 mlrd teńge somasyna angıograftar, MRT, KT satyp alý josparlanǵan» – dep habarlady vedomostvodan.
Aýyldyq aımaqtardaǵy 655 MSAK nysanyna 254 medıtsına qyzmetkeri jetispeıdi. Onyń ishinde 46 dáriger maman men 208 orta medıtsınalyq personal kerek.
2023 jyly MSAK — 39 nysanyna jáne KAOA — 89 jas maman jumysqa ornalastyryldy. Bıyl MSAK nysandaryna jumys isteý úshin 215 grant ıegerin jiberý josparlanyp otyr.
Ulttyq jobanyń sheńberinde 3 mindetti iske asyrý kózdelip otyr: birinshisi — 655 MSAK nysanyn (257 medıtsınalyq pýnkt, 238 FAP, 160 dárigerlik ambýlatorııa) salýdy qamtıtyn aýyldyq eldi mekenderdi MSAK uıymdarymen qamtamasyz etý. Ekinshisi — jumys istep turǵan aýdandyq aýrýhanalardy jańǵyrtý (ǵımarattardy kúrdeli jóndeý, rekonstrýktsııalaý, ınsýlt jáne kardıologııalyq ortalyqtar, medıtsınalyq ońaltý, travmatologııa jáne ortopedııa, hırýrgııa, reanımatsııa, qarqyndy terapııa jáne t. b. bólimsheler ashý) jáne olardy jaraqtandyrý arqyly 32 zamanaýı kópbeıindi ortalyq aýdandyq aýrýhanany uıymdastyrýdy qamtıtyn aýyl halqyna shuǵyl medıtsınalyq kómek kórsetýdiń ýaqtylyǵyn arttyrý. Úshinshi mindet — aýyldyq densaýlyq saqtaý nysandaryn medıtsınalyq kadrlarmen qamtamasyz etý. Osy mindet boıynsha aýyldyq densaýlyq saqtaý nysandary úshin 1100 medıtsına qyzmetkerin daıarlaý josparlanǵan.
