Aýyldy kadrmen qamtý: joǵary oqý oryndaryna arnaıy kvota bólinedi

ASTANA. KAZINFORM — Aýyldyń áleýmettik-ekonomıkalyq damýy baǵdarlamasy aıasynda joǵary oqý oryndaryna arnaıy kvota boıynsha oqýǵa múmkindik beretin bilim berý baǵyttarynyń tizimi bekitildi.

Tıisti buıryqqa Ǵylym jáne joǵary bilim mınıstri 2025 jylǵy 1 tamyzda qol qoıdy.

Qujatqa sáıkes, kvota 63 bilim berý baǵdarlamasy tobyna qoldanylady. Arnaıy tizimge aýyldyq jerlerde suranysqa ıe pedagogıkalyq, medıtsınalyq, agrarlyq, tehnıkalyq jáne gýmanıtarlyq mamandyqtar engizilgen.

Onyń qatarynda:

— Pedagogıka salasyndaǵy baǵyt — qazaq, orys, shetel tilderi, matematıka, fızıka, bıologııa, hımııa, geografııa, quqyq negizderi men ekonomıka, mýzyka, kórkem eńbek, dene shynyqtyrý páni muǵalimderin daıarlaý, sondaı-aq bastaýysh jáne mektepke deıingi bilim berý;
— Medıtsına jáne densaýlyq saqtaý salasyndaǵy mamandyqtar — jalpy medıtsına, pedıatrııa, stomatologııa, farmatsııa, meıirger isi jáne sanıtarlyq-gıgıenalyq is;
— Agrarlyq ǵylymdar — ósimdik sharýashylyǵy, mal sharýashylyǵy, agroınjenerııa, veterınarııa, orman jáne balyq sharýashylyǵy, sý resýrstary;
— Injenerlik-tehnıkalyq jáne IT baǵyt — mehanıka, energetıka, kólik qurylysy, elektrotehnıka, aqparattyq tehnologııa, gıdromelıoratsııa, sýmen jabdyqtaý;
— Basqa da basym salalar — týrızm, qonaq úı jáne meıramhana isi, sanıtarııa, órt qaýipsizdigi, áleýmettik jumys, menedjment, jýrnalıstıka, dástúrli mýzykalyq óner jáne din.

Aıta keteıik, keshe memlekettik bilim berý granttary taǵaıyndaldy.