Aýyldastary qaza tapqan sarbaz týraly: kisiniń aldynan kesip ótpeıtin edi

Mansur Ǵumarovtyń denesi búgin tańmen tabylǵan bolatyn. 

Aqjaıyq aýdany ákimdiginen túsken málimetke qaraǵanda, Mansur Aıtbaıuly 2007 jylǵy 2 maýsymda osy aýdannyń Quraılysaı aýyldyq okrýgine qarasty Juban Moldaǵalıev aýylynda dúnıege kelgen.

2024 jylǵy 13 qyrkúıekte Qazaqstan Respýblıkasy Qorǵanys mınıstrligine qarasty Shoqan Ýálıhanov atyndaǵy áskerı kolledjge oqýǵa túsip, 2026 jyly támamdaǵan. Ol áskerı mamandyqty meńgerip, Otan aldyndaǵy azamattyq boryshyn ári áskerı qyzmetin abyroımen atqardy.

Týystarynyń habarlaýynsha, Juban Moldaǵalıev aýylyndaǵy óz úıinde 26 qyrkúıek kúni qonaqasy berilip, marqum jeksenbide jer qoınyna beriledi. 

Jamanat habardy estigennen búkil aýyl aza tutyp, otbasynyń qaıǵysyna ortaqtasyp, kóńil bildirip jatyr.

Mansurdyń anasy Láıla Zınekenova Talap mektep-bóbekjaı kesheni dırektorynyń oqý isi jónindegi orynbasary bolsa, ákesi Aıtbaı Ǵumarov – qarapaıym jumysshy. Qaryndasy Názıra Almaty qalasyndaǵy Qyzdar pedagogıkalyq ýnıversıtetiniń 4 kýrsynda oqıdy, inisi Nartaı – 6-synyp oqýshysy.

- Mansurdyń ata-ájelerimen aralasyp turdyq. Ómir boıy el qatarly eńbek etken tamasha adamdar, ájesi bar. Óte tárbıeli otbasy. Mansur kisiniń aldynan kesip ótpeıtin bala edi. Áskerı kolledjdi bitirip, Mańǵystaýǵa barǵanyna eki aıdaı ýaqyt bolǵan eken. Qoldan eshteńe kelmese de, kesheden beri el bolyp kúńirenip, joqtap jatyrmyz. Adam tuıyqqa tirelgende, súıeginiń tabylǵany da janyna jebeý bolady eken, - deıdi Úzildik Eleýbaeva. 

Osy qazaǵa baılanysty turǵyndar 26 qyrkúıekke josparlanǵan Juban (burynǵy Óleńti) aýylynyń 65 jyldyǵyn toılaýdan bas tartty. 

Mańǵystaýda qaza tapqan sarbazdardyń biri Aqjaıyq Ǵılaj Kaztalov aýdany Qaraoba aýylynda senbi kúni jerlenedi. 

Ǵumar Qarash atyndaǵy mektep-gımnazııanyń muǵalimi Rına Baserova Aqjaıyq 5-9 synypta oqyǵan kezinde synyp jetekshisi bolǵan eken. 

Onyń sózine qaraǵanda, Aqjaıyq ol kezde kip-kishkentaı, sap-sary balapan edi. Tilalǵysh, aýzyn ashsa, júregi kórinetin aqjarqyn oqýshy edi. Adamnyń kóńiline qarap turatyn, meıirimdi, ashyq minezdi kóńili taza jan bolatyn. Sómkesine jańa dápterlerdi únemi toltyryp salyp júrýshi edi. Dostaryna únemi qoldaý bildirip júretin. Anasy Gúlsamal Ǵalymqyzy qyrkúıek aıynda Aqjaıyqqa kitap jetpeı qalmasyn dep habarlasatyn.

Synypta týǵan kúnder 15 qyrkúıekte Aqjaıyq Bolatbekulynyń týǵan kúnimen bastalatyn. 

- Synypta týǵan kún keshteri bolmaıdy deseń, renjıtin. Alǵash synyp jetekshisi bolǵan jyldary sabaqtan soń velosıpedimen únemi meniń úıimniń janyna kelip júretin. Syrttan baqylap, esik aldyna shyqsam, biraz áńgime aıtyp, sodan soń ketetin. Meniń shyqqanymdy kútip júretin. Áńgimeshil jan edi. Maǵan kishkentaı bokal syılaǵany bar. Kesheli beri sol bokaldy qolyma ustaı beremin. Dostaryn únemi aldatyp, oınap júretin. Birge oqyǵan Nuredil, Ismaıl, Rýhanııat, Mereı, Saǵyndyq, Erǵazy, Rasýldar kesheden beri habarlasyp, «Apaı, ne bop ketti?!» dep jatyr, - deıdi R.Baserova. 

Oral polıtehnıkalyq kolledjin ótken jyly támamdaǵan Aqjaıyqtyń armandary kóp edi. "Áskerge barasyńdar ma?" degen suraqqa birden oılanbastan "Iıa, baramyn" dep jaýap beretin. Qasyndaǵy dostaryna da "Baramyn dep aıt», dep otyrýshy edi. 

Otbasynda apalary Aıkórkem men Ádemi bolsa, artynan ergen Aqnıet esimdi inisi bar.

- Jazǵy demalys kezinde naǵashylaryma baryp keldim dep qýanyp aıtatyn. Bular synyptan 4 bala bolyp áskerge attanyp edi. Aqjaıyǵymnyń jarqyn beınesi júregimizde árdaıym saqtalady. Er esimi eshýaqyt umytylmaıdy. Kóńilim bosap, ózimdi áreń ustap otyrmyn, - dedi Aqjaıyqtyń ustazy. 

Eske sala keteıik, budan buryn Kaspıı teńizinde joǵalǵan eki áskerı qyzmetshiniń denesi tabylyp, izdestirý operatsııasy aıaqtalǵanyn jazǵan edik.

Sondaı-aq Mańǵystaýda qaza tapqan batysqazaqstandyq sarbazdardyń denesi Oralǵa jetkizildi. 

Mańǵystaýda qaza tapqan sarbazdyń ustazy shákirtiniń úlken áýlettiń úkilegen úmiti bolǵanyn aıtty. 

Mańǵystaýda qaza tapqan batysqazaqstandyq sarbazdyń týǵan jerine oralýyna sanaýly kúnder qalǵan edi.