Aýyldardyń ınfraqurylymyn damytýǵa 900 mlrd teńge bólindi
ASTANA. KAZINFORM – Bıyl aýyldardyń ınfraqurylymyn damytýǵa 900 mlrd teńge bólindi. Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.
«Aýyl - el besigi» baǵdarlamasyn iske asyrý aýyldyq jerlerge jeke ınvestıtsııalar tartýǵa oń áserin tıgizýde. Mınıstrlik tarapynan 2023 jyly bıýdjet qarajaty shyǵystarynyń tıimdiligine taldaý júrgizildi. Mysal retinde, Túrkistan oblysynyń Tóle bı aýdanynyń 16 aýyly 3,5 mlrd teńgege bıýdjetten qarjylandyryldy. Osy aýyldarda 21,2 mlrd teńgege 40 jobany iske asyrýǵa jeke ınvestıtsııa tartyldy. Osylaısha, 1 bıýdjettik teńgege 6 jeke ınvestıtsııa teńgesi tıesili ekenin kórip otyrmyz. Al Aqmola oblysynyń Jaqsy aýdanynyń 6 aýylyna 1 bıýdjettik teńgege 3 jeke ınvestıtsııa teńgesi tartyldy», - dedi ol.
Mınıstr aýyldyq aýmaqtardy damytýǵa ınvestıtsııa salatyn jeke kásipkerlerdiń mańyzdy rólin de atap ótti.
«2023 jyly kásipkerler óz qarajaty esebinen aýyldyq jerlerde mektepter, shıpajaılar, balabaqshalar, demalys oryndary jáne basqa da nysandar saldy. Mınıstrlik tarapynan jyl saıyn barlyq qarjy kózderi esebinen aýyldardyń ınfraqurylymyn damytýǵa bólinetin qarajatqa monıtorıng júrgiziledi. Máselen, 2023 jyly respýblıkalyq jáne jergilikti bıýdjetterden, sondaı-aq basqa da qarjy kózderinen shamamen 1 trln. teńge áleýmettik, ınjenerlik, kóliktik ınfraqurylymdy, qoǵamdyq jáne ekologııalyq qaýipsizdikti damytýǵa baǵyttalǵan. Bıyl bul maqsattarǵa shamamen 900 mlrd teńge josparlanǵan», - dedi Nurlan Baıbazarov.
