Aýyldardaǵy ınternet sapasyn jaqsartý: Halyqaralyq qaıta qurý bankinen qarjy tartylady
ASTANA. KAZINFORM – Búgin Senattyń jalpy otyrysynda «Qazaqstan men Halyqaralyq qaıta qurý jáne damý banki arasyndaǵy qaryz týraly kelisimdi ratıfıkatsııalaý týraly» Zańy maquldandy.
Zań aýyl turǵyndarynyń Qazaqstannyń jekelegen qyzmet kórsetilmeıtin jáne qyzmet jetkiliksiz kórsetiletin aýdandarynda joǵary sapaly keń jolaqty baılanys ınfraqurylymyna qol jetkizýin qamtamasyz etýge baǵyttalǵan.
- Jobany iske asyrý merzimi – 2025-2027 jyldar. Boljam boıynsha osy kezeńde joǵary jyldamdyqty ınternetke 1123 aýyldy eldi meken qosylady. Jobany iske asyrý teń qarjylandyrý esebinen qamtamasyz etiledi: 50 paıyzy – Halyqaralyq qaıta qurý jáne damý bankiniń 42 mlrd teńge kólemindegi qaryz qarajaty, qalǵan 50 paıyzy – jeke seriktesterdiń birlesip qarjylandyrýy. Joba halyqaralyq standarttarǵa sáıkes qatań iske asyrylatyn bolady. Bul rette, otandyq baılanys operatorlary arasynda ashyq konkýrs ótkiziledi, - dedi senator Bıbigúl Aqqojına.
- Jaǵdaı qala men aýyl arasyndaǵy tsıfrlyq teńsizdikti kórsetip otyr. Aýyldy eldi mekenderdiń tórtten bir bóligi zamanaýı tsıfrlyq baılanys tehnologııalarymen qamtylmaǵan. Bul olardyń bilim, densaýlyq saqtaý, memlekettik qyzmetterge jáne ekonomıkalyq múmkindikterge qol jetkizýin shekteıdi. Kelisimdi ratıfıkatsııalaý 1123 aýyldy joǵary jyldamdyqty ınternetke qosý esebinen qala men aýyldyq óńirler arasyndaǵy tsıfrlyq alshaqtyqty qysqartýǵa, tsıfrlyq ınfraqurylymdy damytýdyń arqasynda óńirlerdiń ınvestıtsııalyq tartymdylyǵyn arttyrýǵa múmkindik beredi, - dedi depýtat.
Budan buryn habarlanǵandaı, jaqynda Parlament Senatynda aýyldyq aımaqtardaǵy sapaly ınternet máselesi talqylandy.