Aýyldardaǵy daryndy oqýshyny olımpıadaǵa daıyndaıtyn onlaın mektep ashyldy
ASTANA. Kazinform — Aýyl mektebiniń oqýshylaryn zııatkerlik olımpıadalar men baıqaýlarǵa daıyndaý maqsatynda «Daryn» onlaın mektebi óz jumysyn bastady. Bul týraly «Daryn» respýblıkalyq ǵylymı-praktıkalyq ortalyǵynyń dırektory Gajdembek Tursynov aıtty.
— QR Oqý-aǵartý mınıstrliginiń bastamasymen ekinshi jyl qatarynan Aýyl mektepteriniń oqýshylaryna arnalǵan respýblıkalyq pándik olımpıada ótkizilip keledi. Ol Qazaqstannyń shalǵaı eldi mekenderindegi daryndy jáne talantty balalardyń qabiletterin anyqtaýǵa jáne damytýǵa baǵyttalǵan. 2024 jyly mektepishilik kezeńge 113 myńnan astam bala tirkeldi, bul 2023 jylǵa qaraǵanda bala sanynyń 35 myńǵa kóbeıgenin kórsetedi. Nátıjesinde aýyldyq oqýshylardyń júldeli oryndarǵa ıe bolý kórsetkishi 10 esege jýyq artyp, myńdaǵan aýyl balalary úshin jańa múmkindikterge jol ashty, — dedi ol OKQ alańynda.
Sondaı-aq spıker shalǵaı aýyldardaǵy daryndy balalardy olımpıadalarǵa daıyndaýdyń jańa tásili qolǵa alynǵanyn atap ótti.
— Aýyl mektebiniń oqýshylaryn zııatkerlik olımpıadalar men baıqaýlarǵa daıyndaý maqsatynda «Daryn» onlaın mektebi óz jumysyn bastady. Qazirgi tańda oǵan II Respýblıkalyq aýyl olımpıadasynyń myńǵa jýyq fınalısti syrttaı qabyldanyp, bilimin jetildirýde, — dedi Gajdembek Tursynov.
Eske sala ketsek, 2024 jyly qazaqstandyq oqýshylar 35 halyqaralyq olımpıada men konkýrstarǵa qatysyp, 563 medal jeńip aldy. Onyń 77-si — altyn, 201-i — kúmis, 285-i — qola medal, ıaǵnı ár ekinshi qatysýshy júldeger atanǵan.
Sondaı-aq, jýyrda ǵana astanalyq 7 jasar oqýshy halyqaralyq ǵylymı olımpıadada altyn medal alǵanyn jazǵan edik.