Aýyldarda josparlanǵan 655 medıtsınalyq nysannyń 85-i ǵana salynǵan

ASTANA. KAZINFORM – Prezıdent Qasym-Jomart Toqaev Úkimettiń keńeıtilgen otyrysynda ulttyq jobalardyń der kezinde júzege asyrylmaýyn qur syltaý dep baǵalady. 

«Aýylda densaýlyq saqtaýdy jańǵyrtý» ulttyq jobasy boıynsha 655 nysan salý josparlanǵan edi. Іs júzinde onyń tek 85-i ashylǵan. Munyń bári jumystyń tıimsiz júrgizilip jatqanyn kórsetedi. Jobalyq-smetalyq qujattar tym baıaý ázirlendi, qurylys uzaqqa sozyldy nemese nysandardyń quny qymbattap ketti degen sebepter aıtylyp júr. Munyń qaı-qaısysy da – qur syltaý. Basqa sebebi joq dep oılaımyn. Qajet bolsa, mınıstr de, ákim de kez kelgen máseleni shuǵyl sheshe alady. Demek, sondaı nıet bolmaı tur degen sóz», - dep synǵa aldy Prezıdent.

Sondaı-aq «Jaıly mektep» ulttyq jobasymen jańa formattaǵy 369 mektep salý josparlanǵan. Munda tehnıkalyq qujattar der kezinde ázirlenbegen, jer de ýaqytyly bólinbegen.

«Oǵan qosa, otandyq óndirýshilerdiń kóbi jańa mektepterdiń qurylysyna qatysa almaıtynyn aıtyp, shaǵymdanyp júr. Úkimetke, ákimderge jáne «Samuryq-Qazyna» qoryna ulttyq jobalardy júzege asyrýǵa kedergi bolyp jatqan barlyq máseleni dereý sheshýdi tapsyramyn», - dedi Qasym-Jomart Toqaev.