Aýyldarda shaǵyn ónerkásiptik alańdar qurylady
ASTANA. KAZINFORM – Aldaǵy 3 jylda «Aýyl amanaty» jobasyna 450 mlrd teńge bólinedi. Bul týraly Aýyl ákimderiniń dıalog-platformasynda Premer-mınıstrdiń orynbasary Qanat Bozymbaev aıtty.
- Úkimet aýyldyq aýmaqtardy damytýǵa erekshe nazar aýdaryp otyr. Búginde elimizde 6 124 aýyl bar. Onda 7,5 mln. adam turady. Aýyldyq ınfraqurylymdy jańǵyrtýdaǵy negizgi baǵdarlamalarynyń biri - «Aýyl – El besigi». Baǵdarlama iske asqannan bastap, respýblıkalyq bıýdjetten 2,5 myń aýyldarǵa 874 mlrd teńge bólindi. «Aýyldyq densaýlyq saqtaýdy jańǵyrtý» ulttyq jobasy aıasynda 631 alǵashqy medıtsınalyq-sanıtarlyq kómek obektileri salyndy. Kelesi jyly kópsalaly ortalyq aýdandyq aýrýhanalardy jańǵyrtý jalǵastyrylady. Bul shamamen 4 mln aýyl turǵyndaryn sapaly medıtsınalyq qyzmettermen qamtýǵa múmkindik beredi, - dedi vıtse-premer.
Onyń aıtýynsha, Aýyl halqynyń tabysyn arttyrý maqsatynda «Aýyl amanaty» jobasy iske asyrylyp jatyr. Joba bastalǵannan beri respýblıkalyq bıýdjetten 146 mlrd teńge bólindi. Nátıjesinde 18 myń astam shaǵyn nesıe berildi, 20 myń jýyq jańa jumys orny quryldy.
- Kelesi úsh jyldyqta 450 mlrd teńge bólý josparlanyp otyr. Jobanyń jańa tásilderi ázirlenip, qarjylandyrýdyń basym baǵyttaryna aýyl sharýashylyǵyna jatpaıtyn bıznes túrleri engizildi. Óndirilgen ónimdi saqtaý jáne qaıta óńdeý jaǵdaılaryn jasaý úshin Shaǵyn ónerkásiptik alańdar qurylady. Bul sharalar aýyl ekonomıkasyn ártaraptandyrýǵa yqpal etetin bolady, - dedi Úkimet basshysynyń orynbasary.
Vıtse-premer jas mamandardy aýylǵa tartý maqsatynda 52 myńnan astam mamanǵa «Dıplommen aýylǵa» jobasymen turǵyn úı satyp alýǵa 200 mlrd teńge berilgenin aıtty.
- Budan basqa, sońǵy eki jylda 460 medıtsınalyq mamanǵa 8,5 mln teńgeden birjolǵy tólemder berildi, - dedi ol.
Bozymbaev óńirler arasyndaǵy ınfraqurylymdyq alshaqtyqty qysqartatyn sharalardy atady.