Aýyldarda poshta baılanysynda problema bolýy múmkin - senator

ASTANA. KAZINFORM – Aýyldy eldi mekender poshta qyzmetine sýbsıdııanyń jetkiliksizdigine baılanysty turaqty poshta baılanysyna qol jetkize almaı qalýy múmkin. Bul máseleni senator Álibek Náýtıev óziniń depýtattyq saýalynda kóterdi.

Depýtat «Qazposhta» AQ zań boıynsha ulttyq operator retinde sýbsıdııalaýǵa jatatyn aýyldarǵa merzimdi basylymdardy jetkizýmen qosa ámbebap qyzmetterdi qamtamasyz etýge mindetti ekenin atap ótti. Alaıda, bólingen naqty qarjy shyǵyndardy ótemeıdi, bul operatordyń qarjylyq turaqtylyǵyna úlken júkteme týdyrady. «Qazposhta» tıisti somada qarjylandyrylmaǵan jaǵdaıda bólimshelerdiń jabylý qaýpi bar. Bul turǵyndardyń aqparat pen memlekettik qyzmetterge qoljetimdiligin shekteıdi.

- Memlekettik baǵdarlamalardyń iske asyrylýyna qaramastan, shalǵaıdaǵy jáne qol jetkizý qıyn aýyldy eldi mekenderdiń basym sanynda turaqty keń jolaqty ınternet joq nemese aıtarlyqtaı úzilistermen jumys isteıdi. Mundaı jaǵdaılarda merzimdi baspa basylymdary senimdi aqparat alýdyń jalǵyz kózi sanalady. Internettiń bolmaýy jáne poshta marshrýttarynyń qysqarýy jaǵdaıynda shalǵaıdaǵy turǵyndar «aqparattyq oqshaýlanýda» qalyp qoıýy múmkin. Ásirese, bul jaǵdaı memlekettik aqparattyq saıasatty iske asyrý kezeńinde jáne saılaý kezeńinde, onyń ishinde jalpyulttyq referendýmǵa daıyndyq jaǵdaıynda óte mańyzdy», - dedi Álibek Náýtıev.

Sonymen qatar senator jaǵdaıdy Senattyń salalyq komıtetindegi talqylaýda biryńǵaı memlekettik ustanymnyń joqtyǵy anyqtalǵanyn aıtty.

- Úkimet aýyldyq jerlerde ámbebap baılanys qyzmetterin tolyq kólemde sýbsıdııalaý máselesin sheshý qajet jáne balama qoldaý tetikterin engizý múmkindigin qarastyrý kerek. Baspa qyzmeti men logıstıka arasyndaǵy tikeleı baılanysty qamtamasyz ete otyryp, quzyretti mınıstrlikke merzimdi basylymdardy jetkizýdi sýbsıdııalaý jónindegi quzyretti bekitý bóliginde «Mass-medıa týraly» zańǵa túzetýler engizýdi qamtamasyz etý mańyzdy. Tıisti memlekettik organdardyń qatysýymen ulttyq poshta operatorynyń ózekti máselelerin qaraý jáne oń qarjylyq turaqtylyqty qamtamasyz etý úshin olardy sheshý joldaryn tabý kerek», - dedi depýtat.

Aıta keteıik, buǵan deıin Úkimet Qazposhtany qoldaý tetikterin pysyqtap jatqanyn jazǵan edik.