Aýyldarda qoqys shyǵarýdyń biryńǵaı júıesi engiziledi
ASTANA. KAZINFORM – Qazaqstanda aýyldyq jerlerde qatty turmystyq qaldyqtardy basqarýdyń beıimdelgen modeli engiziledi. Ekologııa jáne tabıǵı resýrstar mınıstri Erlan Nysanbaevtyń tóraǵalyǵymen ótken keńeste osy baǵyttaǵy jobalar qaraldy.
Ekologııa jáne tabıǵı resýrstar mınıstrligi ár aýdannyń erekshelikterin eskere otyryp, kommýnaldyq qaldyqtardy jınaý, tasymaldaý, suryptaý jáne kómý júıesin qalyptastyrýdy kózdeıdi. Bul reforma qaldyqtardyń barlyq túrlerin basqarý tujyrymdamasy aıasynda júzege asyrylyp jatyr.
Kommýnaldyq qaldyqtardy basqarýdyń jańa shemalary pılottyq formatta Almaty, Mańǵystaý, Qyzylorda jáne Aqmola oblystarynda iske asyrylady. Negizgi mindet — aýyldyq eldi mekenderdi qaldyqtardy shyǵarý qyzmetimen tolyq qamtý jáne ony áketýdiń biryńǵaı respýblıkalyq júıesin qurý.
Qazirgi ýaqytta mınıstrlik sarapshylary óńirlermen birlesip ınfraqurylymǵa naqty qajettilik esebin júrgizip jatyr. Tıimdi shemalardy qurý kezinde halyq sany, eldi mekender arasyndaǵy qashyqtyq, qoldanystaǵy ınfraqurylym jáne kórshiles aýdandar men oblystardyń nysandaryn paıdalaný múmkindigi eskeriledi.
-Sonymen qatar keńeste qatty turmystyq qaldyqtardy shyǵarýdy uıymdastyrýdy tsıfrlandyrý jáne qurylatyn ınfraqurylymnyń jumysyn baqylaý máseleleri jeke qaraldy. Júıeli jumys aýyldyq jerlerde jyl saıyn paıda bolatyn zańsyz qoqys úıindileri problemasyn sheshýge baǵyttalǵan,-delingen habarlamada.
Osyǵan deıin «Qazaqstanda qoqysty shıkizatqa aınaldyrýǵa ne kedergi» degen taqyrypta saraptama materıal jarııaladyq.
