Aýyldarda qatty turmystyq qaldyqtardy jınaý jáne shyǵarý júıesi jetildiriledi
ASTANA. KAZINFORM — Ekologııa jáne tabıǵı resýrstar mınıstrliginde aýyldyq eldi mekenderdegi qatty turmystyq qaldyqtardy (QTQ) jınaý jáne shyǵarý máseleleri boıynsha onlaın-keńes ótti.
Keńeske mınıstrlik ókilderi, «Jasyl damý» AQ jáne oblystardyń ákimdikteri qatysty. Jıynǵa Ekologııa jáne tabıǵı resýrstar vıtse-mınıstri Jomart Álıev tóraǵalyq etti.
Kezdesý barysynda aýyldyq eldi mekenderde QTQ jınaý men shyǵarý salasyndaǵy negizgi problemalar jáne olardy elde júrgizilip jatqan qaldyqtardy basqarý reformasy aıasynda sheshý joldary talqylandy. Ótken aptada «Jasyl damý» AQ Parlament depýtattaryna qaldyqtardy basqarý júıesin uıymdastyrýdyń jańa modelin tanystyrǵan bolatyn.
— Reformanyń negizgi mindetteriniń biri — aýyldyq jerlerde QTQ jınaý jáne shyǵarý máselesin sheshý. Mamandardyń baǵalaýynsha, bul másele búginde shamamen 7,4 mıllıon adamdy, ıaǵnı Qazaqstan halqynyń 37 paıyzǵa jýyǵyn qamtyp otyr. Aýyldyq aýmaqtarda qyzmetterdiń ekonomıkalyq turǵydan tıimsiz bolýy bıznes úshin tartymdylyqty tómendetedi. Sonyń saldarynan operatorlar sany shekteýli bolyp, nátıjesinde ruqsatsyz qoqys úıindileri paıda bolyp jatyr, — delingen habarlamada.
Keńes barysynda Qazaqstan Prezıdenti ruqsatsyz qoqys úıindileriniń máselesin sheshý jáne aýyldyq óńirlerdi damytýǵa basymdyq bere otyryp, tıimdi qaldyqtardy basqarý júıesin qalyptastyrý mindetin qoıǵany atap ótildi.
Máseleni sheshýdiń bir tetigi retinde «Jasyl damý» AQ tarapynan aýyldyq jerlerde QTQ jınaý jáne shyǵarý ınfraqurylymyn damytýǵa baǵyttalǵan jeńildetilgen qarjylandyrýdyń jeke baǵdarlamasyn iske asyrý múmkindigi qarastyrylyp otyr. Mundaı qoldaý jobalardyń bıznes úshin ekonomıkalyq tartymdylyǵyn arttyryp, júıeniń turaqty jumys isteýin qamtamasyz etedi dep kútiledi..
Qazir Ekologııa jáne tabıǵı resýrstar mınıstrligi oblys ákimdikterimen birlesip óńirlerdegi jaǵdaıǵa taldaý júrgizip jatyr. Bul taldaý aıasynda qoldanystaǵy ınfraqurylym, qyzmettermen qamtý deńgeıi jáne eldi mekenderdiń qajettilikteri baǵalanyp jatyr. Osy jumystardyń nátıjesinde aýyldyq jerlerde qaldyqtardy jınaý jáne shyǵarý júıesin uıymdastyrý boıynsha naqty óńirlik josparlar ázirlenedi dep josparlanyp otyr.
Júrgizilgen taldaý nátıjesinde QTQ jınaý jáne shyǵarý qyzmetteriniń qoljetimdiligin arttyrýǵa, ruqsatsyz qoqys úıindileriniń sanyn azaıtýǵa jáne Qazaqstannyń aýyldyq óńirlerindegi ekologııalyq jaǵdaıdy jaqsartýǵa baǵyttalǵan keshendi is-sharalar jospary qalyptastyrylady dep kútiledi.
Buǵan deıin Túrkistan oblysynda turmystyq qaldyq tarıfterin zańsyz esepteý faktileri anyqtaldy.
