Aýyldarda dáriger tapshylyǵy máselesi qalaı sheshilip jatyr

ASTANA. KAZINFORM – Densaýlyq saqtaý mınıstrligi dáriger tapshylyǵy máselesin sheshý baǵytynda qandaı tetikter iske asyp jatqanyn túsindirdi.

- Kadrlar tapshylyǵy máselesin sheshý maqsatynda medıtsına qyzmetkerleriniń kásibı qyzmetine quqyqtyq jáne qarjylyq kepildik beretin normalar zańnamalyq túrde qabyldandy. Medıtsına jáne farmatsevtıka qyzmetkerleriniń mártebesin arttyrý maqsatynda áleýmettik kepildikter men yntalandyrý tólemderiniń paketi keńeıtildi, - delingen mınıstrliktiń Kazinform agenttigine bergen jaýabynda.

Atap aıtqanda, myna jeńildikter men yntalandyrý tetikteri qarastyrylǵan:

• keminde bes jyl merzimge aýyldyq jerlerge jumys isteýge kelgen asa tapshy mamandyqtardaǵy medıtsına qyzmetkerlerine 100 AEK mólsherinde birjolǵy aqshalaı tólem;
• «Qazaqstannyń eńbek sińirgen dárigeri» qurmetti ataǵyn jyl saıyn berý jáne 1000 AEK mólsherinde birjolǵy yntalandyrý tólemi, sondaı-aq respýblıkalyq «Úzdik maman» baıqaýynyń jeńimpazyna 500 AEK mólsherinde tólem;
• jergilikti atqarýshy organdardyń medıtsına qyzmetkerleriniń balalaryna turǵylyqty jeri boıynsha mektepke deıingi uıymdardan basym tártippen oryn berýi;
• qyzmettik mindetterin oryndaý kezinde jaraqattaný (jaraqat, kontýzııa, t.b.) saldarynan qaza bolǵan nemese múgedektik belgilengen medıtsına qyzmetkerleriniń balalaryna (asyrap alynǵandar, ógeı ul-qyzdar) joǵary bilim berý uıymdaryna konkýrssyz qabyldana otyryp, bilim berý grantyn berý;
• medıtsınalyq mamandyq boıynsha áskerı qyzmet ótkerý múmkindigi nemese áskerı qyzmetke shaqyrýdan keıinge qaldyrý;
• kólik shyǵyndaryn óteý;
• densaýlyq saqtaý sýbektileriniń qarajaty esebinen medıtsına qyzmetkerleriniń kásibı jaýapkershiligin saqtandyrý modeli engizildi;
• medıtsına jáne farmatsevtıka qyzmetkerlerine qatysty qylmystyq normalar izgilendirildi (ákimshilik aıyppuldar men bas bostandyǵynan aıyrý merzimderi qaıta qaraldy);
• medıtsına qyzmetkerleriniń kásibı qyzmetine zańsyz aralasýdan jáne kedergi keltirýden qorǵaý, sondaı-aq patsıentter men basqa da tulǵalar tarapynan kásibı qyzmetke qurmetpen qaraý normalary tolyqtyryldy.

Sonymen qatar, qazirgi kezde aýyldyq eldi mekenderge jumys isteýge jáne turýǵa kelgen densaýlyq saqtaý salasyndaǵy mamandarǵa respýblıkalyq bıýdjet qarajaty esebinen kelesi áleýmettik qoldaý sharalary kózdelgen:

1. 100 AEK mólsherinde kóterme járdemaqy;
2. Turǵyn úı satyp alý nemese salý úshin áleýmettik qoldaý – tómendegi mólsherde bıýdjettik kredıt: aýdan ortalyǵy sanalatyn aýyldarǵa kelgen mamandar úshin – 2 500 AEK-ten aspaıtyn soma; basqa aýyldyq jerlerge kelgen mamandarǵa – 2 000 AEK-ten aspaıtyn soma.

Foto: Astana ákimdigi

Munymen qosa, QR Úkimetiniń 2022 jylǵy 30 qarashadaǵy №961 qaýlysymen bekitilgen 2023–2027 jyldarǵa arnalǵan kóshi-qon saıasaty tujyrymdamasyna sáıkes:

• jańa qonysqa qonys aýdarǵandar úshin turǵyn úı qunynyń 50%-yna deıingi mólsherde qarjylyq kómek kórsetetin ekonomıkalyq mobıldik sertıfıkat;
• «Jastar praktıkasy» jobasy aıasynda jas mamandardyń jalaqysyna qosymsha ústemaqy belgileý eskerilgen.

- 2024 jyldyń qorytyndysy boıynsha 2 161 jas maman jumysqa ornalastyryldy (aýylda–370, qalada–1 791). «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańynyń 14-8), 14-9) tarmaqshalaryn oryndaý aıasynda aýyldyq jerlerge keminde bes jyl merzimge jumys isteýge kelgen asa tapshy mamandyqtardaǵy medıtsına qyzmetkerlerine 100 AEK mólsherinde tólem jasaý kózdelgen. Qazirgi ýaqytta 15 óńirde asa tapshy mamandyqtar tizimin bekitý týraly sheshim qabyldandy (onyń ishinde 2025 jyldyń 1-toqsanynda – 5 óńir), al 2 óńirde (Abaı, Jambyl oblystary) sheshim qabyldanbaǵan. 228 adamǵa tólemder berildi (onyń ishinde 2025 jyldyń 1-toqsanynda – 21 adam). «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańynyń normalaryna sáıkes, densaýlyq saqtaý salasy mamandaryna áleýmettik qoldaý kórsetý tártibi normatıvtik túrde bekitilgen jáne ony jergilikti atqarýshy organdar deńgeıinde iske asyrý qajet, - dep atalyp ótken mınıstrlik aqparatynda.

Eske salsaq, bıyl naýryz aıynda Qazaqstan Respýblıkasy Prezıdentiniń Jarlyǵymen memlekettik jáne qoǵamdyq qyzmetke cińirgen eńbegi, eldiń áleýmettik-ekonomıkalyq jáne mádenı damýyna qosqan eleýli úlesi, sondaı-aq áskerı jáne qyzmettik boryshyn úlgili atqarǵany úshin bir top azamat memlekettik nagradalarmen marapattaldy. 

Bul rette, «Qazaqstannyń eńbek sińirgen dárigeri» qurmetti ataǵy «University medical centre» korporatıvtik qorynyń bas konsýltanty Úkibasova Talshyn Muqadesqyzyna berildi.