Aýyldarda 228 medıtsınalyq nysan salynyp jatyr — depýtat
Májilis depýtaty Gúldara Nurymova Prezıdent Qasym-Jomart Toqaevtyń saılaýǵa túsip, saıası dodada jeńiske jetkenine bir jyl tolǵanyn eske saldy, dep habarlaıdy Kazinform.
Halyq qalaýlysynyń paıymynsha, Memleket basshysynyń saılaýaldy baǵdarlamasyn iske asyrý moınymyzǵa júktelgen mańyzdy mindet, tııanaqty tapsyrma boldy. Baıypty baǵdarlama laıyqty baǵaǵa ıe bolyp, san salaǵa serpin berdi.
«Sonyń biri medıtsına salasy men ony qamtamasyz etý baǵyty boldy. Bul rette aýyl turǵyndaryna medıtsınalyq kómek kórsetý deńgeıin arttyrý kózdeldi. Bul maqsatta «Aýyldyq densaýlyq saqtaýdy jańǵyrtý» pılottyq ulttyq jobasy bekitildi.
Búginde ulttyq joba aıasynda 13 alǵashqy medıtsınalyq-sanıtarlyq kómek nysandarynyń qurylysy aıaqtaldy. 86 nysanda qurylys-montaj jumystary júrgizilýde», — dedi Gúldara Nurymova
Ol 13 zamanaýı perınataldyq ortalyq qurý, onkologııalyq ortalyqtardy salý jáne jańǵyrtý, aýyldyq jerlerde 228 medıtsınalyq obekt salý boıynsha jobalar iske asyrylyp jatqanyn da atap ótti. Aýylda medıtsınalyq kadrlardy qoldaý jáne daıarlaý boıynsha jaǵdaılar jasalýda.
«2023 jyldyń 9 aıynda qashyqtyqtan kórsetilgen medıtsınalyq qyzmetter nátıjeli boldy. Onyń ishinde telemedıtsınalyq konsýltatsııalardyń sany 687 453-ti qurady.
Jastar densaýlyq ortalyqtarynyń jelisi keńeıýde. Búginde qalalar men aýyldyq jerlerde 138 jastar densaýlyq ortalyqtary jumys isteıdi. 2023 jyldyń 9 aıynda 620 652 adam osy ortalyqtardyń qyzmetimen qamtyldy.
Qoryta aıtqanda medıtsına salasynda mańyzdy jobalar júzege asyp keledi. Bul — Prezıdentimizdiń sara saıasaty men saılaýda bergen ýádesi mejeli ýaqytta oryndalyp jatqanyn kórsetedi. Birjyldyqqa naqty nátıje, jeteli jetistikpen jetip otyrmyz», — dedi depýtat.
Gúldara Nurymova kópshilikti Prezıdentti qoldap, ary qaraı memlekettik saıasatty iske asyrý jolynda aıanbaı qyzmet etýge shaqyrdy.
