Aýyldan Stenfordqa: Aqtóbelik túlek armanyna qalaı jetti
ASTANA. KAZINFORM – Aqtóbe oblysy Mártók aýdanyndaǵy №2 mektep-gımnazııasynyń túlegi Arýjan Aldajarova álemdegi jetekshi joǵary oqý oryndarynyń biri – Stenford ýnıversıtetine grantpen oqýǵa tústi.
Aýyl mektebinde bilim alǵan jas túlek ýnıversıtetke 100 paıyzdyq grantpen qabyldanǵan. Jibek Joly telearnasyndaǵy «Búgin.LIVE» baǵdarlamasynda jetistikke jetý jolymen bólisti.
Arýjannyń aıtýynsha, Stenfordqa túsý armany bala kezinen bastalǵan. Onyń AQSh-ta bilim alý týraly maqsatyn qalyptastyrýǵa anasynyń qoldaýy erekshe áser etken.
– Alǵash ret AQSh týraly armanym paıda bolǵan kezde, ony maǵan anam aıtyp, sol armanymdy tolyq qoldaǵan da anam boldy. 8-synypqa kelgende AQSh ýnıversıtetterine túsý degen maqsat paıda boldy. Ata-anamnyń qoldaýynyń arqasynda ózime degen senim qalyptasty. Armanym men maqsatym aıqyn bolǵandyqtan, 8-synyptan bastap daıyndyqty bastadym, – dedi Arýjan.
AQSh ýnıversıtetine túsý úshin bir ǵana oqý ornyn tańdaý jetkiliksiz. Sondyqtan Arýjan Aldajarova birneshe ýnıversıtettiń talaptaryn, bilim berý múmkindikterin, professorlaryn, fakýltetterin jáne ózi tańdaǵan mamandyqqa sáıkestigin zerttegenin aıtty.
Osy izdenistiń nátıjesinde Stenford ýnıversıteti onyń eń qalaýly oqý ornyna aınalǵan. Arýjan ýnıversıtette ekonomıka jáne saıasat baǵytynda bilim alýdy josparlap otyr.
Stenfordqa túsý jolyndaǵy mańyzdy kezeńderdiń biri – halyqaralyq emtıhandarǵa daıyndyq boldy. Ol SAT jáne IELTS synaqtaryn tapsyryp, joǵary nátıje kórsetti. Alaıda Arýjannyń aıtýynsha, AQSh ýnıversıtetterine qabyldaný tek test nátıjelerine baılanysty emes.
Onyń oqý úlgerimimen qatar, jazǵan esseleri, alǵan marapattary, túrli baǵdarlamalarǵa qatysýy jáne qoǵamdyq belsendiligi de qarastyrylǵan. Sondyqtan Arýjan mektep qabyrǵasynda júrgen kezinen bastap óz múmkindigin jan-jaqty damytýǵa tyrysqan.
–Ýnıversıtetke túsý úshin tek emtıhan nátıjesi jetkiliksiz. Esseler, alǵan marapattar jáne basqa da jetistikter birge qarastyrylady. Mektep aýylda ornalasqanymen, qolymnan kelgen múmkindiktiń bárin paıdalanýǵa tyrystym. Onlaın jobalardy izdedim, túrli baǵdarlamalarǵa qatystym, volonterlik jumystarmen aınalystym, sportpen shuǵyldandym. Bir baǵytty tańdap, sol jolmen júıeli túrde júrýge tyrystym, – dedi ol.
Arýjan aýylda bilim alýdyń ózine kedergi bolmaǵanyn atap ótti.
Onyń pikirinshe, qazirgi zamanda bilim alýǵa múmkindik beretin onlaın resýrstardyń kóp bolýy oqýshyǵa óz betinshe izdenýge jol ashady.
– Adamnyń qaı jerde týǵany nemese qaıda turǵany mańyzdy emes. Barlyq shekteý sanada. Aýylda bolsaq ta, ózimizge berilgen múmkindikti barynsha paıdalanýǵa tyrystyq, – dedi Arýjan.
Jas túlek úshin Stenfordqa qabyldaný – tek jeke jetistik emes, týǵan mektebi men ustazdarynyń da eńbeginiń nátıjesi. Arýjannyń jetistigi aýyl mektebinde bilim alyp júrgen oqýshylardyń da álemniń úzdik ýnıversıtetterine túsýge múmkindigi bar ekenin kórsetedi.
Aıta keteıik, buǵan deıin, aýyl men qala oqýshylary arasyndaǵy bilim alshaqtyǵy 5 balǵa qysqarǵanyn jazǵan edik.
