Aýyldaǵy jaldamaly baspanaǵa ótinish berýdiń jańa tártibi engizildi
ASTANA. KAZINFORM – Elimizde aýyldy jerlerdegi jaldamaly baspanany bólýdiń jańa tártibi engizildi. Endi turǵyn úı kezeginde turǵan azamattar óz aýdanyndaǵy arendalyq baspanany ózderi tańdap, ótinish bere alady. Bul týraly QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov aıtty.
Jańa tetik 1 qyrkúıekten bastap «Otbasy bankiniń» saıtynda iske qosyldy.
— Azamat turǵyn úı kezeginde qaı aýdanda tursa, sol aýdanda usynylǵan jalǵa beriletin baspanalardyń birin tańdap, oǵan ótinish bere alady. Qazirdiń ózinde 400-ge jýyq azamat aýyldy jerlerden baspana tańdady, — dedi komıtet tóraǵasy.
Sonymen qatar ol turǵyn úı kezegine otbasy quramynda kimder kiretini de naqty belgilengen. Olardyń qataryna erli-zaıypty, balalar, onyń ishinde asyrap alynǵan balalar men olardyń otbasylary, sondaı-aq erli-zaıyptynyń ata-analary kiredi.
Bul otbasy múshelerine de turǵyn úı kezegine turǵan negizgi ótinish berýshige qoıylatyn talaptar qoldanylady.
Aıta keteıik, buǵan deıin Qazaqstanda turǵyn úıge muqtaj azamattarǵa 2 jáne 5 paıyzdyq jeńildetilgen ıpoteka beriletini jóninde jazdyq. Bıyl osy baǵytta 12,6 myń qaryz berý josparlanǵan. Oǵan 175,1 mıllıard teńge qarastyrylǵan.
