Aýyldaǵy «qudaıy qonaq» tsıfrlandy: Icaravan platformasynda 60-qa jýyq úı tirkeldi

Icaravan – bul aýyl turǵyndary men saıahatshylardy tikeleı baılanystyratyn platforma. Munda qonaq úıler emes, qarapaıym otbasylar qyzmet kórsetedi. Saıahatshy qosymsha arqyly taksı shaqyrǵandaı ońaı ádispen ózine unaǵan úıge usynys tastaı alady.

– Men 14 jyl shetelde turyp, jınaǵan tájirıbemdi óz aýylyma paıdasy tısin degen nıetpen osy jobany bastadym. Aýyldaǵy aǵaıynǵa buny «qudaıy qonaq» salty arqyly túsindirdik. Aýyl adamyna «siz aqshaǵa tamaq satpaısyz, siz jolaýshyǵa pana bolasyz» desek qana olar tez túsinedi. Bul – álemde damyp kele jatqan «Slo-tourism», ıaǵnı qarapaıym jolmen saıahattaý mádenıeti. Qazir platformada 60-qa jýyq úı tirkelgen, maqsatymyz bul kórsetkishti 1000-ǵa jetkizý, – deıdi Talǵat Álı.

Kásipkerdiń aıtýynsha, qazirgi tańda Kólsaı men Altyn Emel ulttyq parkteriniń mańyndaǵy aýyldarda qyzmet kórsetý quny bir adamǵa 10-15 myń teńge aralyǵynda. Bul somaǵa jatyn oryn, keshki jáne tańǵy as kiredi.

– Týrıstke bes juldyzdy otel emes, sol jerdiń tabıǵaty men adamdardyń qonaqjaılylyǵy mańyzdy. Oǵan Saty aýyly dálel. Kólsaıǵa aǵylǵan jarty mıllıon adamdy otelder emes, qarapaıym aýyl úıleri qabyldap otyr. Bizdiń júıede tamaq restorandaǵydaı emes, úı ıesi ózderi ne jese, sonyń bir bóligimen qonaqpen bólisedi. Eki jaq ta bir-birine baǵa berip, qaýipsizdik máselesi álemdik tájirıbe boıynsha retteledi, – dep atap ótti kásipker.

Statıstıkaǵa súıensek, byltyr Qazaqstanǵa 15,7 mln sheteldik týrıst kelgen. Ásirese, Reseı, Qytaı, Úndistan jáne Germanııadan keletin qonaqtardyń qarasy qalyń. Icaravan qosymshasy qazirdiń ózinde qazaq, orys, aǵylshyn jáne qytaı tilderinde qyzmet kórsetedi.

Bolashaqta platforma tek qonaq kútýmen shektelmeı, aýyldaǵy jergilikti gıdter men transfer qyzmetterin de kartaǵa engizýdi kózdep otyr.

Aıta keteıik, Qazaqstannyń týrızm salasy jańa beleske kóterildi. 2025 jyldyń 9 aıynda ishki týrıster sany 6,7 mln adamǵa jetip, ótken jylmen salystyrǵanda 741 myńǵa artqan.